Zestoa

Santakutzak ospatuko dituzte Zestoako bizilagunek datorren astean

Santakutz jaietan murgilduko dira zestoarrak datorren astean. Ohi bezala, danborradak izango dira jai egitarauaren osagai nagusia: ostegun gauean egingo dute helduena, eta ostiral arratsaldean, berriz, umeena.

Jaiak ostegunean jarriko dira martxan, 19:00etan kalejira bat izango da Idiakaitz Txistulari Taldearekin, Azpeitiko Bandarekin eta Zestoako Musika Bandarekin. Helduen danborrada 22:30ean hasiko da; hauek dira hitzorduan parte hartuko duten elkarteak eta taldeak: Ipintza eta Lauiturri (Zumai txaranga); Aldrebesak eta Atabalak (Azpeitiko banda); Trapuzarrak eta Zitxontarrak (Ustekabe txaranga); Gure Txokoa eta Gaztetxea (Zestoako banda). Ondoren, Ustekabe txarangaren emanaldia izango da.

Ostiralean, 10:30ean, Idiakaitz Txistulari taldearen diana izango da; 12:30ean, meza nagusia parrokian; eta 18:00etan, umeen danborrada.