Elkartasunaren alde pausoak Urkulun

Urkuluko urtegia elkartasun unibertsalaren islada izango da beste behin ere. Mundukidek antolatuta, LKS Krean, Fagor Elektronika eta Athlonekin batera, Kooperatiben arteko VII. Lasterketa Solidarioa egingo da urriaren 16an.

Taldean lasterka zein oinez, motelago edo azkarrago, hamar urterekin edo berrogeirekin... modu askotan parte hartu ahalko da ekintza solidario honetan. Izen-ematea jada irekita dago www.mundukide.org helbidean, urriaren 12a arte, edo lasterketa egunean bertan, Urkulun, Otalora jauregiko aparkalekuan 8:30etik 10:30era.

Zazpigarren edizio honetan, deialdi berezia egiten diote antolatzaileek gizarte osoari parte hartzera gonbidatuz. Nahiz eta X3 lasterketa kooperatibetako bazkideei soilik zuzenduta egon, gainontzeko modalitate guztiak publiko orori zabalik daude.

Partehartzaile bakoitzak 10 euro ordainduko ditu eta batutako dirua Mundukideren garapen proiektuak babestu eta finantziatzera bideratuko da.

Kirol modalitateetan parte hartzerik ez duen edonork, dortsal solidarioa eskuratu dezake eta horrela elkartasun ekimen honekin bat egin 10 euro emanez.

X3 lasterketan kooeratiba bakoitzeko hiru pertsonako taldeek korrituko dute Urkuluri urtegiari bira ematen (6,3 km) 11:00etan abiatuta.

Martxa nordikoa, ibilbide berdinarekin, publiko orori zabalik dago eta 10:00etan hasiko da. Azkenik, oinezkoa, hau ere publiko guztientzat, 10:30ean aterako da.

Urtero gerturatzen dira haur eta gaztetxoak gurasoekin batera Urkuluko lasterketara eta aurten 2004-2016 bitartean jaiotako gaztetxoenen parte hartze gosea asetzeko lasterketa berezia izango dute, adin tarte bakoitzari dagokion distantzia egokituta: 2014-2016 jaiotakoak: 400 metro; 2012-2013 jaiotakoak 500 metro; 2010-2012 jaiotakoak 1.000 metro; 2008-2009 jaiotakoak 1.500 metro; 2004-2007 jaiotakoak 7.000 metro. Irteera goizeko 10:00etan abiatuko da eta parte hartzea doakoa da.

Temas

• Arrasate/Mondragón