Lazkao

Euskararen alde lanean hasi dira jada Lazkaon

Lazkao prest dago Euskaraldia 2025 ospatzeko. Udalak eta herriko hainbat eragilek dagoeneko martxan jarri dute ekimenaren antolaketa, eta martxotik aurrera izena emateko epea irekiko dela jakinarazi dute. Herritarrak gonbidatuta daude ekimen honetan parte hartzera, euskararen erabilera sustatzeko eta hizkuntza-ohiturak aldatzeko helburuarekin. Aurtengo edizioak berrikuntzak eta jarduera bereziak ekarriko ditu, herrian euskararen erabilera indartzeko.

Euskaraldia ekimen herritarra da, eta euskaraz hitz egiteko eta ulertzeko gaitasuna dutenen arteko elkarrizketak bultzatzeko asmoa du. Aurreko edizioetan izandako arrakastari esker, Euskaraldia euskaldunen arteko hizkuntza-praktiketan eragiteko tresna eraginkorra bihurtu da. Helburua da hizkuntza-ohiturak aldatzea, euskara gehiago, gehiagorekin eta gehiagotan erabiltzea sustatuz.

Euskaraldiaren laugarren edizioa maiatzaren 15etik 25era egingo da, 'Elkar mugituz egingo dugu!' lelopean. Aurreko edizioek Lazkaon harrera beroa izan dute, eta antolatzaileek espero dute 2025ekoak ere herritarren inplikazio handia jasotzea. Aurreko urteetako Euskaraldiko antolatzaileek herritar eta herriko eragileekin lehen bilera burutu dute jada. Bilera horretan, ekimenaren xehetasunak azaldu eta lan taldeak antolatu zituzten, proiektua martxan jartzeko.

Aurtengo edizioan izena emateko epea martxotik aurrera irekiko da, eta interesa dutenek www. euskaraldia.eus webgunean aurkituko dute informazio gehiago. Euskaraldian parte hartzeko, bi rol aukeratu daitezke aurten ere. alde batetik, 'Ahobizi'-ren papera, non euskaraz hitz egingo dutenak, solaskideak ulertzen duela badakite behintzat. Bestalde 'Belarriprest' deritzotenak ere egongo dira, euskaraz hitz egiten dietenei euskaraz erantzuteko edo ulertzeko prest daudenak.

Horrez gain, entitateek ere parte hartu dezakete, 'ariguneak' sortuz, hau da, euskaraz lasai hitz egiteko guneak sustatuz. Herriko hainbat elkarte, merkataritza-gune eta enpresek dagoeneko izena emateko asmoa adierazi dute.

Udalak adierazi duenez, Euskaraldia bezalako ekimenak ezinbestekoak dira euskararen normalizazioan aurrera egiteko. «Gure hizkuntza sustatzeko ardura guztiona da, eta Euskaraldiak herritarrei aukera paregabea ematen die euskaraz hitz egiteko ohiturak sendotzeko», azaldu dute udal ordezkariek.

Ekimen honen bidez, euskararen erabilera handitzeko urrats berriak emango dira Lazkaon zein Euskal Herrian. Herritarrek, taldeek eta erakundeek elkarlanean jardungo dute, euskaraz gehiago, gehiagorekin eta gehiagotan hitz egin dadin.