Txikitasunean handi

Kaixo, ikus-entzuleok! Eta irakurleok! Gaur 'Gure Eskola' proiektuari dagokion erreportajea Hondarribiko Egiluze Ikastetxetik eskainiko dizuegu. Hainbat astetan aritu gara gure erredakzio-taldeetan erreportajearen ezaugarriak lantzen, erreportajerako gaiak hautatzen, informazioa biltzen eta aukeratzen, eta azkenik, papereratu eta ikus-entzunezko erreportajea grabatu eta editatzen. Hau duzue lan horren emaitza: 'Txikitasunean Handi' erreportajea. Zatozte gurekin izenburu honen azpian dagoena ezagutzera!

Gure Ikastetxea Hondarribian dago. Eskola txikia da. Jaio berri diren ikasleak eta DBH amaitzear gaudenak elkarrekin bizi gara eraikin berean, baina ikasgela bakarra dugu ikasmaila bakoitzean eta horrek berezi bihurtzen du gure egunerokotasuna.

Gutako bakoitza bat eta bakarra da. Berezia. Eta txiki-txikitatik halaxe sentiarazten gaituzte. Pasioz, inplikazioz eta bokazioz beterik aurrera egiten laguntzen digute. Bakoitzaren beharretara egokituz, bakoitzari behar dugun arreta eta babesa eskainiz, eta gure irakasleek zeruak eta lurrak mugitzen dituztenez gu etorkizunerako prestatzeko eredu onenen bila, aurten Folkeskola jarri dute martxan ikastetxean.

Ederki ezagutzen gaituzte irakasleek, bidelagun ditugu eta gure beharrak ikusten dituzte. Eta ez behar akademikoak bakarrik! Baita pertsonalak ere! Garrantzi handia baitute gure egunerokoan. Hortxe ikusten da gutako bakoitzarekiko konpromisoa.

Familia bat osatzen dugu. Horixe da gure eskolatik gehien maite duguna, eta gure traolak dioen moduan, #etxeanbezala sentitzen gara. Familian gertatu ohi diren gauzak gertatzen zaizkigu eta hitz eginez eta hausnartuz konponbidea bilatzen diegu arazoei. Denok dugu gure lekua familian. Desberdinak eta anitzak izan arren, taldea osatzen dugu. Eta benetako talde lana zer den ikasten dugu, bakoitzak bere onena emanez, emaitza hobea lortzen dugula jabetuz.

Txiki zein handi, elkarrekin bizitzen ikasten dugu: Elkarrekiko begirunea izaten, taldean lan egiten, gure inguruko errealitateari lotutako proiektuak gauzatzen, elkarri irakasten eta elkarrengandik ikasten, gure esperientziak eta lanak partekatzen, elkarrekin jolasten, elkarrekin tertuliak egiten, elkarrekin amesten…

Guztiok ezagutzen dugu elkar eta gure arteko harremanak lantzeko eta hainbat esperientzia eta ikaskizun bizitzeko irteerak, bidaiak eta jarduerak egiten ditugu. Besteekiko konpromisoa lantzen dugu.

Gure eskolan ateak eta leihoak zabalik daude eta ikastetxearen kanpo aldea ere ikasteko leku bihurtzen da askotan, 'Goazen kanpora' proiektuaren harira. Gure balkoi, jolastoki, lorategi, baratza… beste modu batera ikasi, gozatu eta jolasteko erabiltzen ditugu. Mahai eta aulkiak kanpora atera eta jolasak, tertuliak, musika… denetarik lantzen dugu natura zainduz eta naturatik ikasiz. Gure ama lurrak ematen digunaren kontzientzia landuz, birziklapena, patruila berdeak, Agenda 20/30 eta ingurumena zaindu eta hobetzeko proiektuak eta ekintza ugari egiten ditugu. Gure lurrarekiko konpromisoa dugu.

Konpromisoa dugu gure herriarekin, kulturarekin eta euskararekin. Bertatik bertara ditugu alde zaharra, baserritarrak eta arrantzaleak, mendia, itsasoa eta hondartza. Eta horiek guztiak baliatzen ditugu gela barruan ikasten ditugun gauzak kanpora atera eta zuzenean ikusi eta lantzeko. Nola? Herriari lotutako proiektuak eginez, euskara bultzatzeko ekimenak gauzatuz, herriko elkarte edo erakundeek proposatutako ekintzetan parte hartuz…

Gizartearekiko konpromiso hori hainbat esparrutara zabaltzen dugu ikasturtean zehar egin ohi ditugun ekintza ugariren bidez, beharra dutenei lagundu asmoz: Liburu, janari edo eskulan azokak; elikagaien bankua; jostailuak biltzeko kanpainak; emakumeekiko indarkeriaren aurkako ekimenak; Agenda 20/30eko ekintzak; herriko egoitzako aitona-amonei egiten dizkiegun bisitak…

• Temas
• Euskera
• Hondarribia