Zarautz

Kale garbiketako zerbitzuko kideek igoko dute San Pelaio bandera

San Pelaio jaietarako bi hilabete falta direnean, Xabier Txurruka alkateak apirileko osoko bilkuran jakinarazi zuen kale garbiketako zerbitzuko kideak izango direla aurten herriko jaien hasierako bandera igoeran protagonistak. «Beren lana ez da inoiz jaietako egitarauan agertzen baina, gonbidapen honekin, Zarauzko kale eta plazak festen biharamunean jaiarekin jarraitzeko prest egon daitezen egiten duten lana nolabait aitortu nahi diegu. Aurtengo sanpelaioetako egitarauan protagonista izango dira, ondo merezita».