Tolosaldeko lehenengo Ecolabel saria jaso du Lete Nekazalturismoak

Iñaki Irazabalbeitia, Jose Ignazio Gorostidi, Asun Murua eta Edurne Ayuso. / NÚÑEZ
Iñaki Irazabalbeitia, Jose Ignazio Gorostidi, Asun Murua eta Edurne Ayuso. / NÚÑEZ

Jose Inazio Gorostidi eta Asun Muruaren apartamentu turistikoek oso neurketa zorrotzak gainditu dituzte

NÚÑEZALKIZA.

Duela hiru hamarkada ireki zuten Jose Inazio Gorostidik eta Asun Muruak Lete nekazalturismoa Alkizan. Duela hiru urte, berriz, eskaintza osatu zuten eskualdeko lehenengo apartamentu turistikoekin. Azken urteetan garrantzia hartzen joan den ingurugiroaren zainketa oso kontutan hartu zuten Gorostidik eta Muruak apartamentuak eraikitzerakoan, eta orain saria izan du beren esfortzuak, Ecolabel ziurtagiria jaso baitute, ingurugiroa modu bikainean zaintzeagatik.

Eraginkortasun energetikoa modu berezian zaindu dute Leteko apartamentuetan, eguzki-plakak jarriz, kontsumo gutxiko etxetresna elektrikoetan, baita berogailu sisteman ere. «Ecolabel sariek dena hartzen dute kontutan, papera edo xaboietik hasi eta berogailu-sistemara. Oso neurketa zorrotzak dira», azaltzen dute Gorostidik eta Muruak.

Biomasa kaldera

Beraien kasuan A maila, onena, lortu dute eraginkortasun energetikoaren neurketan, eta gasen isurpenak oso baxuak dituzte, biomasa kaldera dutelako. Horrez gain, uraren kontsumoa gutxitzeko edota zaborrak sailkatzeko praktikak egin behar izan dituzte.

Eraginkortasun energetikoan maila gorena lortzeko eraikuntzako zein egunean-eguneko erabilerak eduki behar izan dituzte kontutan, hamalau produktu edo zerbitzu multzotan banatutakoak, besteak beste, garbiketa-produktuak, etxetresna elektrikoak, altzariak, eraikuntza materialak, berogailu-sistema, papera edota ehunak. Kontutan hartzen da ere uraren eta zaborraren kudeaketa edota produktu jasangarrien erosketa.

Europan 1.575 lizentzia daude gaur egun, eta horietatik 30 dira euskaldunak, Espainia mailan lizentzia gehien dituen erkidegoa.

Eusko Jaurlaritzako Ingurumen sailburuordetzak kudeatzen du Europar Etiketa Ekologikoa, Ecolabel izenekoa, eta Basquetour-en bitartez ezarri da, EVEren eta Ihoberen laguntzarekin. Oinarrian Europar Komisioaren araua betetzean datza ziurtagiriaren lorpena. Azken araua 2017koa da, eta bost urtez behin berritzen dute, eskaera berriak sartuz.

Leteko nekazaletxe berriak lau apartamentu barne hartzen ditu, bi solairutan banatuta, baita txoko bat erdi-sotoan sukalde eta guzti ere. Lau pertsonentzako apartamentuak dira, horietako bat ezinduentzako egokitua, sukaldea, egongela, komuna eta bi logelarekin.

Iñaki Irazabalbeitia Alkizako alkatearen esanetan, berri ona da Leteko apartamentuek lortu duten saria. «Herrian dugun nekazalturismo bakarrak horrelako sailkapena lortzea oso ona da, horrek adierazten duelako bai herrian dugun aztarna ekologikoa gutxituko dugula, baita bertan zerbitzu ona eskaintzen dela», azpimarratzen du.