Tobera Musika eskolan apuntatzeko garaia da

Musika eskolako ikasleak ETB1eko Ba!goaz programaren finalaurrekoan izan ziren. /  T.M.E.
Musika eskolako ikasleak ETB1eko Ba!goaz programaren finalaurrekoan izan ziren. / T.M.E.

Maiatzaren 29a eta 30a dira Toberan izena emateko egunak

El Diario Vasco
EL DIARIO VASCO GOIERRI.

2019ko irailaren 10ean hasiko du 2019/2020 ikasturtea Segurako, Zegamako, Zeraingo eta Mutiloako Tobera Musika- eta Dantza-eskolak. Irailetik aurrera Toberan ikasle izan nahi duten guzti-guztiek orain eman behar dute izena. Musika-eskolan lehenengo aldiz hasi nahi dutenek, aurtendik jarraitu nahi dutenek eta garai batean musika ikasi bai, baina azkenaldian utzita izan ondoren, itzuli nahi dutenek ere orain dute unea tokia hartzeko Tobera Musika-eskolan.

Hain zuzen ere, maiatzaren 29a -asteazkena- eta 30a -osteguna- dira izena emateko bi egun bakarrak. Egun horietako batean, arratsaldeko 7etatik 8etara bitartean, Zegamako edo Segurako kultura-etxeetara joatea besterik ez da egin behar. Bertan bete daiteke izenemate-orria, erraz eta azkar asko, eta, hala, 2019/2020 ikasturtean TOBERA Musika- eta Dantza-eskolako partaide izango da hala nahi duenak. Argibideak ere hantxe jaso ahal izango dira, baina, aurrez, musika-eskolarekin harremana eginda edo tobera.org webgunean eskura liteke informazioa.

Abenduaren 31 baino lehenago 4 urte beteta izatea da baldintza bakarra. Helduek irakaskuntza-lerro propioa dute musika ikasteko. Hileko kuotak apalak dira: erreferentzia gisa, aurtengo ikasturtean, taldeko irakasgaiengatik 16,8 euro ordaindu dira hilean, eta bakarkakoengatik 32,3 euro. Deskontuak ere badira tarifa horien gainean. Beraz, ume, haur, gazte nahiz heldu, edonork du eskura musika. Musika-hizkuntzaz eta euskal dantzez gain, aukera zabala du instrumentuetan eta musika-taldeetan Toberak. Taldeei dagokienez, helduen rock taldea, gazteen konbo taldea, trikitilari, pandero-jotzaile eta perkusio-jotzaileena eta 4 txistu- eta danbolin-talde osatuko dira hurrengo ikasturtean, gutxienez. Ikastaro laburrak ere posible dira, txalapartakoak, adibidez.

Herrigintza eta musikagintza

Tobera Musika-eskolaren emaitzak zeintzuk diren gertu-gertutik ezagutzeko, ekainaren 13an izango da aukera Zegamako plazan, eta 18an Segurakoan, orduan egingo ditu-eta ikasturte-bukaerako jaialdiak musika-eskolak. Baita Zegamako San Joan suaren inguruko erromerian ere. Bestalde, maiatzaren 26an Beasaingo Dantzari Txiki Egunera joango dira 40 ikasle. Gainera, ETB1eko Ba!goaz kantu eta dantza telebista-programaren finalaurrekoan izan berri dira publiko modura Tobera Musika-eskolako ikasleak -maiatzaren 24an emitituko da-. Ekintza ugariek ederki uztartzen dute gela-barruko lana eta kanporako joera. Izan ere, Toberan izena emateak musikazaletasun-premia asetzen du, baina herriaren alde egiteko modu paregabea ere bada.