Sormenaren Kabia sortu da Alkizan artistek egonaldiak egiteko

Koldobika Jauregi, Edurne Ayuso, Garazi del Rey eta Jon Umerez atzoko aurkezpenean. /  NUÑEZ
Koldobika Jauregi, Edurne Ayuso, Garazi del Rey eta Jon Umerez atzoko aurkezpenean. / NUÑEZ

Hamabost eguneko egonaldia eskainiko zaio lehiaketa bidez aukeratutako artista bati bere lana garatzeko

NÚÑEZ ALKIZA.

«Urtero bada sai zuri bikote bat Afrikatik migrazioan Alkizara etortzen dena, kabia egitera. Pentsatu genuen guk ere, zergatik ez izan gure kabia, artistentzako topaleku izango zena», aurkeztu zuen Edurne Ayuso Fagus Alkiza Interpretazio Zentroko Kultur dinamizatzaileak Sormenaren Kabia proiektu berria. Horren baitan, hamabost eguneko egonaldia eskainiko zaio lehiaketa bidez aukeratutako artista bati bere lana sortu eta garatzeko.

Duela hamar urte hasi ziren Alkizan naturaren eta gizakiaren arteko harremanaren inguruko lanak egiten antzinako lanen berreskurapenarekin, eta badira bost urte Fagus Alkiza interpretazio zentroa sortu zela Hernio-Gazume babes eremuaren inguruan. Lanen hiru ardatzak Fagus Alkizaren hiru oinarriak biltzen dituzte: natura, gizakia eta bien arteko harremanetatik sortzen den kultura.

«Azken urteotan naturaren eta Hernio-Gazume eremuko bioaniztasunaren inguruan lan egin dugu batez ere. Bigarren ardatza hemengo herritarrek, baserritarrek mendeetan egin duten lana izango litzateke. Horren inguruan duela bi urte larreak berreskuratu genituen eta aurten bigarren urtez herriko abereak bertan pasako dute uda. Orain, hirugarren ardatza, kultura, lantzeko unea iritsi da», azaldu zuen Jon Umerez Alkizako alkateak. Duela hilabete inguru eman zuten lehen pausoa herrian egin zen Artisten Topaketarekin eta oraingoan egonaldia antolatu dute, «artearen sorkuntza gizarteratzeko tresna moduan».

«Gero eta horrelako ekimen gehiago daude munduan, zein Euskal Herrian, baina Gipuzkoan ez dago horrelakorik, ezta landa-eremuari dagokionez ere. Hiriez gain, kultura landa eremuetan ere egin daitekeela erakusteko aproposa izango da», azpimarratu zuen Ayusok. Artista bakarrarekin eta hamabost egunekin hasiko badira ere, helburua «denbora luzatzea edota kabia handitzea» dira.

Sormenaren Kabian edozein espezialitateko artistek euren lana aurkeztu ahal izango dute. Gaurtik datorren abuztuaren 6ra arte aurkeztu ahal izango dira proiektuak. Epaimahai batek erabakiko du zein izango den aukeratua, eta iraila eta urria bitartean gauzatuko da egonaldia.

Lete nekazaletxean

Artista Lete nekazaletxeko apartamentuetan egongo da eta bere lana Nekazaletxean bertan, Inazio Urruzola txakolindegian zein Koldobika Jauregik zuzentzen duen Ur Mara Museoan garatu ahal izango du. Era berean, Jauregiren aholkularitza jasotzeko aukera izango du horrela nahi izanez gero.

Egonaldia, hala ere, ez da itxia izango, eta artistak herritarrekin harremana izateko aukera izango du, eta «herritarrek zein bisitariek bere lana ezagutzeko aukera izango dute», horretarako utziko diren tarteetan. Lanak natura, gizakia eta kultura izan beharko ditu ardatz eta horrela, ezingo ditu natura kaltetzen dituzten materialak erabili eta biztanleekiko errespetuz jokatu beharko du.

Contenido Patrocinado

Fotos

Vídeos