Sanson proba girotzeko txangoa igandean

Maiatzaren 4ean jokatuko da Segura-Zerain mendi lasterketa. /  A.E.
Maiatzaren 4ean jokatuko da Segura-Zerain mendi lasterketa. / A.E.

A. ETXEBERRIA SEGURA.

Maiatzaren 4ean jokatuko da Segura-Zerain Mendi Lasterketaren 4. ekitaldia, Sanson proba, arratsaldeko 4etan hasita. Aurreko urteetan bezala, bi ibilbide izango ditu; proba luzea, 25 km-koa eta 1.600 metroko desnibelekoa eta motza, 15 km-koa, 800 metroko desnibela gainditzea eskatuko diena korrikalariei. Goierri Kopa Trailen barruan dago proba eta aurtengoan sariak jarri dira lasterketaren errekorrak hausten dituztenentzat. Parte hartu nahi dutenek kronoak webgunean eman dezakete izena.

Probaren antolatzaileak hasiak dira dagoeneko prestakizunetan eta lasterketa girotzeko txangoa antolatu dute igande honetan. Goizeko 8.30ean irtenda, ibilbide motza eta luzea ezagutzeko aukera izango da, erritmo ezberdinetan. Ondoren hamaiketakoa egingo da. Ibilbideari dagokionez, ez dago aldaketa nabarmenik aurten eta proba luzeak Zerain-mendiko maldak eta Haitz-lehorreko igoera eta jaitsiera lotuko ditu. Ibilbide laburrak Txoritegiko haitzetik Harrizala aldera joko du, bertatik ibilbide luzearekin bat egiteko.

Korrika bihar Seguran

Korrika 21 bihar goizean iritsiko da Segurara. Goizeko 8:42ean hartuko da lekukoa Turbaseko errotondan eta Zubiberriko errotondaraino eramango dute korrikalari herritarrek. Euskararen aldeko lasterketari ongi etorria egiteko, gaur zenbait ekitaldi antolatu dira: horrela, 15:30ean Korrika Txikia egingo da eta ondoren Lip dub-a eta txokolate jana izango dira. 17.00etatik aurrera buruhandiak aterako dira eta 18.00etan hasiko da patata tortilla lehiaketa. 19.30ean egingo da sari banaketa eta pintxo jatea.

Bihar goizean 7:45ean jarri da elkartzeko ordua plazan, korrikarako beroketak egin eta petoak bana-tzeko.