Saninazio jaiak, bihartik aurrera

YARZAALTZO.

San Inazio egunerako aste bete eskas geratzen denean, dena prest dago Altzon herriko jaiei hasiera emateko. Bihar botako dute jaien hasierako txupinazoa eta uztailaren 31an, San Inazio egunera arte luzatuko dira festak.

Goizeko 11:30ean jaurtiko dute txupinazoa eta ondoren, marrazki lehiaketako sari-banaketa egingo dute eta jarraian, Artea dantza-taldeko haurrek emanaldia eskainiko dute. Arratsaldean, berriz, Elektrotxufla taldearekin kalejira egingo da eta 19:00etan entzierro txikia eskolatik abiatuta. Ondoren, bertso-triki poteoa izango da Eli Pagolarekin eta Mikel Artolarekin. Egunari amaiera emateko Gabezin taldearekin erromeria izango da.

Igandean, jubilatuen hamaiketakoak emango dio hasiera egunari. Ondoren, 12:30ean herri-kirol erakustaldia eskainiko dute Urra harri-jasotzaileak eta bi aizkolari bikotek, Alkizaletek eta Urteagak, eta Maika Aristegik eta Irati Astondoak. Bazkalondoren, 15:30ean, plater-hausketa egingo da, eta 17:00etan pilota partiduak jokatuko dituzte herriko gazteek. Jarraian, entzierro txikia egingo da eta jarraian, Xabier Solanoren kontzertua izango da, Calcinorrek babestua. Iluntzeko 21:00etan zahagi-ardoa izango da eta gauean Fan&Go taldearekin erromeria, Calcinorrek babestua hau ere.

Astelehenean, hilaren 29an, ekitaldi bakarra izango da: gaueko 22:00etan Artea eta Alurr dantza-taldeetako ikasleek emanaldia eskainiko dute. Asteartean, berriz, San Inazio egunaren bezperan, haur-jolasak antolatuko dira goizean eta 16:30ean, antzerkia. Iluntzean zikiro-jatea egingo da eta gauerdian San Inazio eresia dantzatuz hasiko dute herriko patroiaren eguna.  

Asteazkenean goiz-eresia joko dute goizeko 9:00etan. 11:00etan haurrentzako txirrindulari proba antolatuko da eta jarraian, txakolin-probaketa egingo da. Arratsaldean Alurr dantza-taldeak 'Irradak' ikuskizuna eskainiko du. Gaueko 22:30ean bertso-jaialdia izango da Nerea Ibarzabal, Miren Artetxe, Maialen Lujanbio, Andoni Egaña, Amets Arzallus eta Unai Mendizabal bertsolariekin. Gauerditik aurrera Drindots taldearen erromeriak emango die amaiera jaiei.