Odolkiari gorazarre beste behin

Babarrun plateren osagarri aparta./
Babarrun plateren osagarri aparta.

Beasaingo Olano harategiak jaso zuen XXXII. Odolki lehiaketako sari nagusia

MURUA ORMAIZTEGI.

Ormaiztegiko Ander Deunaren jaien azken egunean odolkiak hartu zuen lekukoa, izan ere, ohiko azokaz gain haren inguruan hainbat lehiaketa antolatu ziren. Nagusia XXXII. Odolki lehiaketa izan zen eta aspaldian sariak har-tzen ohituta dagoen Beasaingo Olano harategiak irabazi zuen hemen ere. Bederatzi harakinek parte hartu zuten eta duela aste batzuk Beasainen eta pasa den asteazkenean Ordizian bezalaxe, Olano izendatu zuten hemen ere errege. Jesus Mari Garmendia izan zen bigarren eta Ander Murua hirugarren. Lehiaketaren amaieran bertaratu zirenek odolkia dastatzeko aukera izan zuten.

Ormaiztegiko odolkia osagaitzat duten plateren XVII. sukaldaritza lehiaketara, berriz, zortzi plater aurkeztu zituzten. Hiru sari banatu ziren bertan: platerik onenarena Edurne Mendizabalek eraman zuen; aurkezpen onenarena Haizea Díezek; eta 14 eta 18 urte bitarteko gazteena, Juan Jose Lapitz saria alegia, Araitz Cuadradok.

Omenaldientzat ere izan zen unerik atzo: Pablo Murua eta Martin Callejori eskaini zitzaizkien. Odolki lehiaketa abian jarri zenetik, Muruak urtez urte hutsik egin gabe parte hartzen zuen. Martxoan zendu zen, eta atzokoan bere ogibidea izan zuen harakingintzagatik, odolkigile bezala eginiko lan oparoagatik eta odolkigintzari eginiko ekarpenengatik urrezko odolkia eskaini zioten bere bizilagunek oroigarri gisa. Semeek jaso zuten haren izenean.

Odolki lehiaketarekin batera antolatu ohi den ardo dastaketaren aurtengo edizioa ere oso berezia izan zen, lehen aldiz Martin Callejo izena eraman baitzuen. Dastaketa honen antolaketan laguntzailea izan zen urtarrilean hil zen Martin, eta izendapen honekin lan hori guztia eskertu nahi izan diote. Senditar gertukoenak izan ziren bertan.

 

Fotos

Vídeos