San Nikolas Txikiaren agintea Segurako kaleetan

Malenek lagundu zion Nikolas Txikiari. /
Malenek lagundu zion Nikolas Txikiari.

A. ETXEBERRIA SEGURA.

San Nikolas Txikiak bereganatu zuen protagonismoa atzo Segurako kaleetan. Abenduaren 6an ohitura denez, obixpoz jantzita zeharkatu zuen hirigunea kantu-eskean, bere inguruan ibili ziren haurrek etxeetako leihoetatik erortzen ziren gozokiak jasotzen zituzten bitartean. Luar Murgiondo Presa izan zen atzokoan Nikolas txikia eta goizeko 10.00etarako eliz aurreko arboladian zegoen, festari hasiera emateko zain. Sotana, mitra, bakulu eta obispoaren agintea azaltzen duten elementu guztiez apainduta, goizean zehar bidelagun izango zuen pottokaren gainera igo eta Kale Nagusian behera abiatu zen Luar, kantu-eskeari hasiera emateko. Eguraldia ere ona izan zuen obispo txikiak eta jende ugari gerturatu zen festa jarraitzera.

«Bota, bota, bota...»

Kale Nagusiko lehen etxeetan egin zuen Luarrek San Nikolasen lehen erregua eta bere lagunek «San Nikolas Txikia gure ganbaran hazia» abestiarekin erantzun zioten ohi bezala. Abestia amaitutakoan, haur denak «bota, bota, bota...» oihukatu zuten etxeetako leihoetara begiratuaz, bizilagunek gozokiak botatzeko eskatuaz.

Malenen laguntza izan zuen Nikolas Txikiak ibilbidean zehar eta, bandeja eskuetan zuela, bera arduratu zen bizilagunek emandako opariak gordetzeaz. Hiriguneko lehen etxeetan egin ziren errito horiek jarraipena izan zuten gero herriko auzoetan eta bizilagunak ongi portatu ziren haurrekin, hainbat leihoetatik erori baitziren mota guztietako gozokiak. Beti bezala, poltsak gozokiz ondo beteta joan ziren bazkaltzera Segurako haurrak.

 

Fotos

Vídeos