Nagore Legarreta eta Beñat Ralla, Sormenaren Kabiko artistak

NÚÑEZALKIZA.

Sormenaren Kabiak ezagutzen ditu jada bere bi kide berriak. Nagore Legarreta eta Beñat Ralla izango dira aurten Alkizara udazkenean etorriko diren artistak. Guztira Hogeita lau proposamen jaso ditu Fagus Alkizak artistentzako egonaldian parte hartu ahal izateko. Gehiengoa, hamabost, emakumeenak izan dira, beste bost gizonezkoena eta gainerakoak ellkarte edo konpainia artistikoenak.

Berriro ere, munduko herrialde ezberdinetatik jaso dituzte proposamenak, Txiletik, Argentinatik, Lituaniatik, Frantziatik, baita arte-mota ezberdinetakoak ere, dantzatik hasi eta zinemagintzaraino, baina guztien artean Legarretaren eta Rallaren lanak aukeratu ditu epaimahaiak.

Lanen aukeraketa sei kidez osatutako epaimahai batek egin du: Jon Umerez Alkizako alkate ohia eta EHUko irakaslea, Lorea Agirre kazetaria eta Jakin-eko zuzendaria, Koldobika Jauregi eskultorea, Antzane Lasarte CPIE Euskal Itsazbazterra erakundeko kultura bitartekaria, Ramon Agirre aktorea eta idazlea eta Haizea Barcenilla artearen historian doktorea eta arte kritikoa. Aukeraketarako, proposamenaren originaltasuna, Fagusen hiru ardatzekin (natura, gizakia eta kultura) koherentzia, Sormenaren Kabiak eskaintzen dituen lan-espazioetara egokitzapena eta artistak azaldu duen interesa izan dituzte kontuan.