Merkataritza sustatzeko Singular Dendak proiektua aurkeztu dute

Proiektuaren aurkezpena egin zuten Lazkaon./
Proiektuaren aurkezpena egin zuten Lazkaon.

Erosketa esperientzia nabarmenak sortzea da markaren helburua, bezeroak erakartzeko eta haien leialtasuna lortzeko

A.A. LAZKAO.

Duela hiru urte Gipuzkoako Foru Aldundiak eta Merkatarien Federazioak abiatutako proiektua da Singular dendak, eta 2019ko edizioa eskualdeko komertzioei aurkezteko ekitaldia egin zen pasa den astean Lazkaon. Beasaingo, Lazkaoko eta Ordiziako merkatariei zuzendutako aurkezpena izan zen, eta proiektua zertan datzan azaldu zien hiru herrietako merkatariei.

Bereizketaren eta etengabeko hobekuntzaren aldeko apustua egiten duten Gipuzkoako saltokientzako sortutako marka da Singular Dendak eta bere helburua «erosketa esperientzia nabarmenak sortzea» da. Sortu zenetik gaur arte Gipuzkoako 163 komertziok lortu dute Singular Dendak zigilua, horietatik 12 Goierritarrak (Lazkaon Koboloi eta Miszelania).

Herrietako kaleak biziberritzea, eta herrietako dendetan dagoen originaltasuna bultzatzea bilatu nahi du ekimenak, horregatik bezeroekin konprometituak diren saltokiak, kultura propioa dutenak, eta bezeroaren erosotasuna bilatzen duten dendak eskura dezakete zigilua.

Zigilua lortzeko pausoak

Singular Dendak zigilua lortzeko hainbat urrats eman behar dituzte merkatariek. Lehen urratsa hasierako diagnostiko bat egitea izaten da. Tratu pertsonala, salmenta puntua (harremanetarako espazio gako bezala), produktu bereizgarria eta on/off komunikazioa hartzen dira kontuan. Bezero misteriotsuaren teknikaren bidez egiten da lehen diagnostiko hori.

Bigarren pausoa ekintza plana definitzea izango da. Bezero misteriotsuaren bisitaren balorazio txostena aztertu eta hobetu daitezkeen arloak definituko dira bertan. Hobekuntza horretara bideratutako ekintzak zehaztea izango da hirugarren urratsa, banan banako aholkularitzaren eta taldekako tailerren bidez.

Laugarren eta azken urratsa, egindako lanaren jarraipena eta ebaluazioa egitea izango da. Ziurtagiria jasotzen dutenek konpromiso bat ere hartzen dute: etengabeko hobekuntzan aritzea, komertzioari balioa emango dioten ekintzak eginez.

Singular Dendak proiektuaren 2019ko edizioan parte hartu nahi duten komertzioek orain dute izena emateko aukera. www.singulardendak.com helbidera jo dezakete horretarako, edo 943 425 557 telefono zenbakira deitu. Udalean ere eskuratu daiteke proiektuari eta programari buruzko informazio gehiago.