Liburutegia, jubilatuen lokala edo taberna bat egongo dira Txantxanen

Alde honetan taberna-denda egongo da. /  NÚÑEZ
Alde honetan taberna-denda egongo da. / NÚÑEZ

NÚÑEZ ADUNA.

Udalak duela bi urte erosi zuen Txantxa-enea etxeko beheko solairua balio anitzeko gunea izango da laster. Izan ere, liburutegia, jubilatuentzako lokala, taberna eta haurrentzako lokala kokatuko ditu bertan. Proiektua jada prest dago eta eraberritze lanak esleitze prozesuan daude. Bost hilabeteko lanen ondoren, plaza-inguru hau biziberritzea espero dute.

Udalak duela bi urte erosi zuen lokala, bi solairutan banatuta dagoena. Bata kalearen maila berean eta bestea sotoan. Gainera, terraza ere badauka. Kaleko mailan dagoen gunea bitan banatuko da. Terrazaren aldean taberna eta denda egokituko dira eta bestean udal liburutegia jarriko da. Tabernak ez du sukalde zerbitzurik izango eta Uztartza jatetxearen osagarria izango da betiere. Taberna txikia izango da eta terrazan jubilatuentzako lokala izango du alde batean.

Txantxaneko ate handitik liburutegira sarrera egongo da. Egun liburutegia Udaletxeko bigarren solairuan dago eta aldaketa honekin herritarrentzako erakargarriagoa egitea espero dute. Hiru guneak elkarri konektatuta egongo dira eta batetik bestera joateko aukera egongo da. Hala ere, sarrera independentea ere izango du bakoitzak.

Eraberritze lanek 377.000 euroko aurrekontua dute. Erein programari esker %60ko diru-laguntza jasoko du Udalak. Lanak Miguel Angel Irazabalbeitia arkitektoak eta Javier Santos aparejadoreak diseinatu dituzte. Momentu honetan obren lehiaketara aurkeztu diren proposamenak aztertzen ari da Udala.