Lazkaomendin ere jai giroa nagusi

Giro apartan pasa zituzten Lazkaomendiko jaiak txiki nahiz helduek. /  A. ALARCIA
Giro apartan pasa zituzten Lazkaomendiko jaiak txiki nahiz helduek. / A. ALARCIA

San Prudentzioak pasata, asteburuan ospatu dira aurten ere festak

AINARA ALARCIA LAZKAO.

Apirilaren 26an piztu zuten lazkaotarrek San Prudentzioen suziria udaletxeko balkoitik eta maiatzak 1 arte festa giroa izan zen nagusi herriko kaleetan. Asteburuan Lazkaomendik hartu du ordea lekukoa eta festarekin jarraitu dute lazkaotarrek, hiru egunez aurtengoan.

 Ostiraleko txupinazo eta karaokearen ondoren, txirrindulari proba, mus txapelketa, puzgarriak, pailazoak edo buruhandi eta erromeria izan ziren larunbat arratsaldean Pipasen, euriak festa behar baino azkarrago bukatzea eragin zuen arren, eta iluntzean, afari herrikoiaren ondoren, trikitilariekin dantzan bukatu zuten eguna Lazkaomendira hurbildu zirenek.

Igandean, berriz, eguraldia lagun, ibilaldi neurtua egin zen Lazkaoko plazatik Itxurrenera, eta bertan haur jolasetan eta erromerian dantzan ibili ziren parte hartzaileak bazkaltzeko ordua arte. Meza ere ospatu zen, 12,00etan, eta arratsaldean herri kirolak ikusteko aukera izan zen. Eguna eta festak bukatzeko, trikitilari eta bertsolarien saioa izan ziren Itxurrenen.

Ez ohiko osoko bilkura gaur

Lazkaoko udalak ez ohiko osoko bilkura egingo du gaur, 19:00etan. Eguneko gai zerrenda honakoa izango da: Aurreko akta, Alkatetzaren ebazpenen berri ematea, Gurutze 1-2 urbanizazio lanen 2. obra egiaztagiria, Hiri garbiketa zerbitzuaren prezioen berrikuskapena, Kreditu gehigarri bidezko 1 zenbakidun kreditu aldaketa, Gizarte zerbitzuetako hitzarmena Gipuzkoako Foru Aldundiarekin eta Galderak eta erreguak.

Hauteskundeak LKEn

LKEak bere zuzendaritza berritzeko hauteskunde-prozesua maiatzaren 3an abiatu dela jakin arazi nahi du. Lehenengo pausua izan da Hauteskunde-batzordea osatzea, zeinak aipaturiko prozesuaren bilakaera egokia bermatuko duen.

Legeak ezarritako araudiari jarraiki, ekainaren 3an irekiko da hautagaitzak aurkezteko epea, zeinera aurkeztuko ahalko den Elkarteko edozein bazkide, eta ekainaren 13an itxiko da epe hori.

Bukatutakoan, Hauteskunde-batzordeak aurkeztutako hautagaitzak aztertuko ditu eta zuzenak direnak aitortuko. Beharrezkoa balitz, ekainaren 18an Hauteskunde-Batzordeak hauteskundeak deituko lituzke aurkezturikoen artean hautatzeko, 15 eguneko epe maximoan.