Kutturru areto futbol taldeak partidarik galdu gabe jarraitzen du

Ikaztegietako Kutturru areto futbol taldeak partidarik galdu gabe jarraitzen du, eta areto futboleko lurraldeko Hirugarren mailan bere multzoan bigarren dago. Azkeneko jardunaldian 7-7 berdindu zuen Eskoriatzaren aurka. Gol festa izan zen, eta zaleek gozatzeko aukera izan zuten. Hala ere bi taldeek atzean erraztasun handiak eman zituzten, eta hortik etorri ziren golik gehienak.

Eskoriatzarrak joan ziren aurretik partidaren zati gehienetan, hasierako minutuetan sartu baitzituzten golak. Ikaztegietarrak 3-4 atzetik zirela iritsi ziren atsedenaldira, eta bigarren zatian ere, hiru gol azpitik jarraitu arren, seina berdintzea lortu zuten eta partidaren azken zatian, lehenengo kanpotarren golak eta ondoren ikaztegietarrenak zazpiko berdinketarekin utzi zuen partida amaiera. Josu, Leunda, Brahim, Rufo eta Moha izan zen hasierako bostekoa. Gelbentzu, Aparicio, Mokthar, Arruabarrena eta Murua ere aritu ziren.