Korrikaren 21. ediziorako prest

Irura. Ikasleek eta irakasleek dantzan amaitu zuten Korrika/ YARZA
Irura. Ikasleek eta irakasleek dantzan amaitu zuten Korrika / YARZA

NÚÑEZ/YARZA TOLOSALDEA

. Martxan den Korrikako 21. edizioa Tolosaldetik larunbatean igaroko den arren, Anoetako Ikastolako ikasleek atzo ospatu zuten. Testigua Irurako Ikastolatik iritsi zen Anoetara, bi herrien arteko zubian testiguen elkartrukea egin ondoren. Jarraian, herriko kaleak zeharkatu zituzten. Ibilbidea Anoetako Ikastolan amaitu zuten eta testiguak zeraman mezua irakurri zuten bertan.

Korrikaren inguruan antolatutako ekitaldien baitan mahai ingurua izango da gaur asteazkena udaletxean. 'Klika: euskaldunon ahalduntzea erronka?' izenburuko mahai ingurua 18:00etan hasiko da.

Iruran ere, Korrika goizeko ordu txikitan pasako dela eta, herriko txikienekin ospatzeko ekitaldi berezia antolatu zuten Ikastolako kideek atzo. Ikastolatik bertatik atera ziren eta testigua herriko gune ezberdinetan iritsi zen Anoetako zubiraino. Maila bakoitzeko ikasleak herriko toki ezberdinetan itxaron zuten gela batetik bestera testigua eramanez, mezu ezkutua barruan zuela.Anoetako zubira iritsitakoan, Anoetako Herri Ikastolako DBHko ikasleekin testigua trukatu zuten, eta plazaraino bueltan joan ziren. Bertan, mezua irakurri zuten eta aurtengo Korrikaren abestia dan- tzatu zuten guztiek elkarrekin.

Korrika ez da Altzotik igaroko, baina hala eta guztiz ere, gogoz ospatu zuten herritarrek igande goizean. Korrika modu fidelean errepikatu zuten, Santa Barbara ermitatik plazaraino giza-katea osatuz lehenengo, eta jarraian plazaraino testigua eramanez. Plazan ireki eta mezua irakurri zuten. Ondoren, Artea taldeko dantzariek emanaldia eskaini zuten eta hainbat jolas antolatu ziren plazan guztientzako. Hamaiketako herrikoiak eta Loatzoko trikitilarien erromeriak alaitu zuen goiza.

Adunako herritarrek giro ederrean ospatu zuten Korrikaren hasiera. Igande goizean pintxo lehiaketa antolatu zuten plazan. Hemeretzi pintxo ezberdin aurkeztu zituzten herritarrek eta guztiak dastatu ondoren, Josunek, Alejandrok eta Ibonek osatutako epaimahaiak Joseba Aburuzarena saritu zuen. Bigarren postua, berriz, Javi Gonzalorentzat izan zen. Gainera, parte hartzaile guztien artean bi opari zozkatu ziren. Ondoren, plazan Korrikari babesa adierazteko argazki erraldoia atera zuten. Jarraian, trikitilariekin batera kalejira egin zuten Zalaba sagardotegiraino, eta bertan bazkaldu zuten.