Jai-giroa nabari da jada Adunan

Esku pilota txapelketako txapeldunak, bere txapela eta trofeoekin frontoian. /YARZA
Esku pilota txapelketako txapeldunak, bere txapela eta trofeoekin frontoian. / YARZA

YARZAADUNA.

Andra Mari jaiak hastear daude Adunan baina atzo hasi ziren jai-giroan murgiltzen. Goizean, haurrentzako buruarinen tailerra antolatu zen Elordi plazako lokalean. Parte hartzaile ugari izan ziren, gurasoek lagunduta, buruarinak egiten, eta amaieran, bakoitzak berea eraman zuen etxera.

Gainera, pelota izan zen nagusi atzokoan. Goizean Caldereria Aburuza pala-txapelketako lehenengo edizioko finalak jokatu ziren, eta arratsaldean, XVI. Trans-Ernio pilota-txapelketako finalak. Frontoia beste urte batez ikuslez bete zen eta guztiek gogoz txalotu zituzten pelotari gazteak.

Finalak hasi aurretik herriko haurrek, Adei Aburuzak, Oihan Aburuzak, Enaitz Alkortak eta Adei Lanzetak, pilota partiduak jokatu zituzten. Segidan, Trans-Ernioko finalak jokatu ziren.

Benjamin mailan Iparragirrek eta Elolak irabazi zuten, Cabezaren eta Aierberen aurka; alebin mailan, Iparragirrek eta Izagirrek irabazi zuten Muruaren eta Elolaren aurka; Infantiletan, Zabaleta eta Landa gailendu ziren Belaunzaranek eta Goiburuk osatutako bikotearen aurrean; eta kadete mailan, Lizeaga anaiek eraman zuten txapela, Irribarriaren eta Garciaren aurka.

Gaur herri-krosa

Ohitura den bezala, gaur goizean herri-krosa antolatuko da Adunan, goizeko 11:00etatik aurrera. Lehenengo haurrentzako eta gaztetxoentzako lasterketak antolatuko dira, eta jarraian, helduena. Eguerdian, sagardo-dastaketa egingo da eta 12:30ean, landare-lehiaketa egingo da. Parte hartu nahi dutenek landareak eguerdirako aurkeztu beharko dituzte plazara. Ondoren, txekor-jatea egingo da.

Toka-txapelketa

Arratsaldeko 18:00etan toka-txapelketa antolatuko da. Ondoren, 19:30ean, Bide Batez musika-taldearekin erromeria hasiko da. Iluntzeko 21:00etan txekor jateko afaria egingo da, eta egunari amaiera emateko Bide Batez taldearekin erromeriak jarraituko du.

Temas

Jaiak