Iñaki Olano Orbegozo altzotarra nagusi bigarren urtez jarraian

Leharrei mendi lasterketako bi podiumak, gizonezkoena eta emakumezkoena. /  BAZTARRIKA
Leharrei mendi lasterketako bi podiumak, gizonezkoena eta emakumezkoena. / BAZTARRIKA

Saioa Arkonada Perez oñatiarra izan zen lehena emakumeen artean Leharrei mendi lasterketaren IV. edizioan

ARANTZAZU BAZTARRIKA GABIRIA.

Larunbat goizean, oraindik behe-lainoak eguzkia ezkutaturik zuenean, Gabiriako kaskoan mugimendu ugari nabari zen, Leharrei mendi lasterketaren IV. edizioa korritzeko eguna baitzen. Goizeko 8:00etarako bolondres eta antolatzaileak lanean ari ziren dena primeran irten zedin, eta baita lortu ere.

Eguraldia lagun zela, 9:30ean, etxafuegoaren seinalearekin batera 140 lasterkari inguru abiatu ziren Ostatu paretik. Mendian gora eta behera 24 kilometro + 1.300 metro paraje ederrak gainditu ostean guztiek leku berdinean amaitu behar zuten.

Bide guztia azkarren Iñaki Olano Orbegozo altzotarrak egin zuen iaz bezalaxe. Hots, bi urtetan jarraian Leharrei lasterketaren irabazlea bera izan da. Aurten gainera, denbora gutxiagoan egin du ibilbidea: iaz 02:02:09 pasa zituen dena egiten, aurten, berriz, 02:01:50. Leharrei aldapa, lasterketari izena ematen dion azken aldapa, azkarren igo zuena ere bera izan zen (05:17), beraz denean gailendu zen altzotarra. Bigarren postua Ion Vegas Lopez de Uralde aguraindarrak erdietsi zuen (02:02:51), eta hirugarren Durangoko Julen Ozaeta Petralandak egin zuen (02:03:02).

Emakumezkoetan, iristen lehena Saioa Arkonada Perez oñatiarra izan zen (02:41:28), bigarrena Amaiur Iglesias Insausti Errenteriakoa (02:45:41), eta hirugarren Zegamako Uxua Barandiaran Zurutuzak egin zuen (02:51:11).

Lasterketan parte hartutako lasterkari guztien artean beste zenbait sari ere zozketatu ziren. Eta produktu bikainez beteriko beste saski bat ere zozketatu zen lasterketarekin lotutako errifen erosleen artean, saridun zenbakia 346 izanik.

Behin lasterketa eta sari banaketa amaituta, antolatzaile eta bolondresek lanean jarraitu zuten guztia jaso eta txukun-txukun uzteko, datorren urtean ere gehiago izango baita.