«Herritarren bizi-kalitatea mantendu eta hobetzeko bidean jarduten dugu»

Amaia Azkuek bigarren legealdia izango du. / YARZA
Amaia Azkuek bigarren legealdia izango du. / YARZA

Bigarren legegintzaldia izango du alkate lanetan Amaia Azkuek eta lan ildo nagusia jada hasita dituzten proiektuak aurrera eramatea izango dela aurreratu du

YARZABERASTEGI.

Udal lanak ezagutzen dituen arren, ilusioz hasi du ikasturtea eta legegintzaldia Amaia Azkuek. Bigarren legegintzaldia izango du alkate lanetan, eta udal-taldean «jende berria badago ere, bide berdina» jarraituko dutela dio. Jada hasita dituzten proiektuak aurrera eramatea izango da lan ildo nagusia, besteak beste, mediku-kontsulta izandakoaren berrerabilpen proiektua, larre komunalen erabilera, edota herritarren parte hartzea sustatzea.

Izan ere, aurreko legealdiaren antzera, «erabaki garrantzitsuak direnean herritarrei parte hartzeko aukera eman nahi diegu, eta parte hartzeko aukerak zabaldu nahi ditugu beste baliabide batzuekin», azpimarratzen du Azkuek. Horien artean dago 'Berastegi sarean' izeneko plataforma, «sortua dagoena, elikatu eta probatzea falta da».

Mediku-kontsultaren proiektua herritarrek erabaki zuten proiektuetako bat da. «Bi proiektu zeuden, bata alberge turistikoa egitekoa eta bestea erabilera anitzeko gela, gimnasioarekin, sukaldearekin, herritarren erabilerarako. Galdeketa egin genuen eta bigarrena aukeratu zen», azaltzen du. Orain, espazio horretan egon litezkeen zerbitzuak aztertzen ari dira.

Aurreko legegintzaldian hasi eta uda honetan martxan egon den proiektua larre komunalena izan da. Udalak Gorosmendin eta Ipuliñon zituen larreak, baita jabetza pribatuko beste batzuk ere, herriko ganaduzaleen esku jarri dira. «Etorlurrekin hitzarmena egin dugu hamabost urterako, eta urtero beraiek arduratuko dira gestionatzeaz. Horretarako ere, abeltzainen elkarte bat sortu da herrian eta hortik kudeatuko da zenbat ganadu eta ze mota, baita egin beharreko lanak ere», dio.

Hemendik aurrera begira, badituzte ere hainbat proiektu. Horien artean dago «baso-eskola antzeko bat jartzea, herritar guztientzako irekia den aisialdirako gune bat, baita herriko baso plana garatzea ere», adierazten du. Horrekin batera, Artalekuko zelaiaren garapena martxan jarri nahi dute. «Garai batean autobideko lurrak bota ziren bertara eta gaur egun 'zona degradatu' bezala izendatuta dago. Hasteko, lurraren azterketa egiten ari gara, ea zenbaterainoko kutsadura duen jakiteko eta lurraren zein tokitan, eta behar izanez gero, deskontaminazio lanak egiteko. Urrian jasoko ditugu emaitzak, eta horren arabera erabakiko ditugu hurrengo pausuak».