Tolosa Goierri

Herri Txikietako areto futbol kopako finalak bihar

I Gipuzkoako Herri Txikietako Areto Futbol kopako finalak hartuko ditu bihar larunbata Bidaniako Ernio frontoiak. Egun guztiko kirol festa antolatu dute eta goizetik iluntzera bitartean jokatuko dira partiduak.

Helduen zein gazteen mailetako sailkapen orokorra erabakitzeko partiduak izango dira. Goizean, 10:00etan hasita, gazteen kopako 5. eta 6. postuak erabakitzeko norgehiagoka jokatuko dute Bidania-Goiatz eta Itsasondok, ondoren, 3. eta 4. postuena Errezil eta Beteluren artean. 14:45etan, maila horretako finala jokatuko dute Berrobi eta Aizarnazabalen artean.

Helduen kopako sailkapenak izango dira jarraian, 15:30etatik aurrera. Lehenengo helduen B kopako 3. eta 4. postuen partidua jokatuko dute Itsasondoko Ijitok eta Arroa Beheak, eta segidan, Errezil eta Ikaztegietaren arteko finala jokatuko da. 17:30ean helduen A kopako norgehiagokak hasiko dira. Leaburu-Txarama eta Itziarren 3. eta 4. postuetarako lehiatuko dute eta, finala, Bidania-Goiatz eta Ikaztegietako Kutturruren artean jokatuko da.

Eguneko azkeneko partidua helduen nesken finala izango da, Aizarnazabal eta Arroa Behearen artean. Egunari amaiera emateko, sari banaketa egingo da kirol munduko aurpegi ezagunen parte hartzearekin. Arratsaldean ere, zozketa egingo da.