Hainbat jarduera antolatu ditu Anduetza parketxeak egunotarako

EDURNE ALBIZU ZEGAMA.

Aste Santuan eta Pazkoko astean naturan ondo pasatzeko helburuarekin Anduetza parketxeak hainbat jarduera antolatu ditu. Bihar bertan, 'Orientazioa pausuz pausu' ibilaldia izango da. Orientazio mapa esku artean izanda altxorraren bila ibiliko dira. «Orientazioaren hastapenak jasotzeaz gain, natura-gune zoragarri batean ibiliko gara. Adin guztietarako eta familian egiteko aproposa», diote antolatzaileek. Abiapuntua Anduetza parketxea izango da goizeko 10:30ean.

Larunbatean, 'San Adrian, denboran zehar igarobidea' ibilaldi gidatua izango da. Gizateriaren Ondare den tunel hau, garrantzia historiko handiko lekua da eta gaurdaino han egin diren indusketa arkeologikoetan azaleratutako aztarnak ezagutzera emango dira. Abiapuntua Aldaola aparkalekua izango da goizeko 10:00etan.

Apirilaren 27an, berriz, 'Txorien kantuak ezagutzeko ibilaldia' izango da. «Txoriek beraien artean komunikatzeko gure belarriak horrenbeste goxatzen dituzten kantuak ezagutzera emango dira». Abiapuntua Anduetza parketxea izango da goizeko 10:00etan.

Bisita gidatuak

Ibilaldi gidatu hauetaz gain, gaur, igandean eta astelehenean Anduetza parketxea ezagutzeko bisita gidatuak izango dira. Parketxean basoaren kultura, pago motzen sekretuak, basoko lanbideak eta zuhaitzak barne-barnetik ezagutzera emango dira. Hitzordua goizeko 11:30ean izango da.