Giro ederrean hasi dituzte Abaltzisketako jaiak

Bertso-bazkariarekin hasi ziren jaiak. /  YARZA
Bertso-bazkariarekin hasi ziren jaiak. / YARZA

YARZAABALTZISKETA.

Atzo eman zieten hasiera San Juan jaiei Abaltzisketan. Herriko tabernetan egindako triki-poteoarekin hasi zuten egitaraua, eta ondoren bertso-bazkaria izan zen Larraitz-gain jatetxean Julio Soto, Haritz Mujika eta Iker Zubeldia bertsolariekin. Herritar ugari elkartu ziren mahaiaren inguruan eta bazkalondoren bertso-saioarekin gozatu zuten.

Gaur, larunbatean, 11:00etatik aurrera haurrentzako jolasak antolatuko dira eta 13:00etan haurrentzako eta gurasoentzako bazkaria izango da. Bazkaria norberak eraman beharko du. Bazkalondoren eramandako postreen dastaketa egingo da. 15:30ean, XVII. Mus Txapelketa herrikoia antolatuko da, eta iluntzeko 21:00etan sagardo-dastaketa egingo da plazan.

Nahi dutenek plazan bertan afaldu ahal izango dute, afaria etxetik eramanda. Egunari amaiera emateko Kupela taldearekin erromeria izango da.