Gipuzkoako Harri Handien Txapelketa jokatuko da bihar Intxaur frontoian

Bost harrijasotzailek hartuko dute parte: Eizmendi, Galarraga, Irigoien, Aranburu eta Unanue

I. A.ZIZURKIL.

Bihar, Gipuzkoako Harri Handien Txapelketa jokatuko da Zizurkilgo Intxaur frontoian. Arratsaldeko 18:30ean hasiko da proba, eta erakustaldi bikaina ziurtatua dago. Eskualdeko bost harri-jasotzaile arituko dira bertan. Hain zuzen ere, Aimar Irigoien errezildarra, Jon Unanue 'Goenatxo III' azkoitiarra, Jokin Eizmendi zarauztarra, Aimar Galarraga oriotarra eta Xabier Aranburu 'Guzta' Urrestillako bizilaguna lehiatuko dira txapelketan. Harri-jasotzaileek egin beharreko lana izango dute: 16/14 arroako (200/175 kiloko) laukizuzena, 16/14 arroako (200/175 kiloko) zilindrikoa, 12 arroako (150 kiloko) kubikoa eta 8 arroako (125 kiloko) bola jaso beharko dituzte. Bi minutuko lana egin beharko dute harri bakoitzarekin.

Txapela Aimar Irigoien eta Jokin Eizmendiren artean egon daiteke, nahiz eta errezildarra izango den faboritoa.