Gibela dastatuz hasi zuten inauteria lizartzarrek

Txarangak alaitutako ostiraleko pintxo-potearen ondoren, atzo eman zioten hasiera inauteriei Lizartzan. Usadioa jarraituz, gibela pintxoak banatu zituzten eguerditik aurrera Aztinondo pilotalekuan, Otsolar Dantza Taldearen emanaldiaz gozatzen zuten bitartean. Adin guztietako herritarrek parte hartu zuten euskal dantza tradizionalak zein koreografietan oinarritutako ikuskizunean. Inauterietako udalbatza ere bertan izan zen jaialdia ikusten. Datorren asteburuan jarraituko dute ospakizunek mozorroen eta dantzarien emanaldiekin.