Gaur ekingo diote San Migel jaietako bigarren asteburuari Iruran

NÚÑEZIRURA.

Haurrentzako egitarau oparoa izango da gaurkoa, San Migel jaien bigarren asteburua hasteko. Goizean, 11:00etatik aurrera, Haur Hezkuntzako eta Lehen Hezkuntzako haurrentzako jokoak antolatuko dira San Migel plazan. Ondoren, buruhandi txikiak izango dira.

Arratsaldean, Gora Kasete haur ikuskizuna izango da plazan, Eidabe taldearen eskutik. Jarraian, kalejira egingo da San Migel plazatik buruhandi eta erraldoiekin, Loatzo Musika Eskolako txistulari eta trikitilariek lagunduta. Ondoren, txistor-jatea egingo da Share elkartean.

Gainera, Xare Irekiko final-erdiak jokatuko dira Ametsa Trinketean 19:00etatik aurrera. Lehen partidan, Apeztegiak eta Funosasek Larronde eta Moncadaren aurka jokatuko dute eta, segidan, De Paredes eta Bortheiru, Driolet eta Etxeverriren aurka arituko dira. Finala bihar jokatuko da 12:00etan. Bestalde, finalaren atarian jokatuko den nesken partida erabakitzeko, sei bikote daudenez, hiru bikote osatu dira eta triangeluar bat antolatu dute. Bikoteak Naroa-Matxalen, Nora-Maider eta Irati-Nahia izango dira eta 10 tantuko joko banara jokatuko dute partida bakoitza.

Gauean, Play back jaialdia egingo da 22:30etik aurrera. Aurten, jaialdian azken urteetan izan den parte hartze beherakadaren ondoren, laburmetrai lehiaketa ere antolatu da. Jaialdiaren ondoren lehiaketako laburmetraiak ikusi ahal izango dira San Migel plazan. Jarraian, zuzeneko musika emanaldiak izango dira gazteen karpan eta ikastolako, Errekalde eta Enara tabernetan.