Tolosa Goierri

Garañoko Gaztelura irteera antolatu du Otsabiok larunbat honetarako

'Lau Gaztelu' erronkaren baitan, larunbat honetarako Garañoko Gaztelura irteera antolatu du Otsabio Kirol Elkarteak. Nafarroako Ollaran udalerriko Egilor eta Saldise kontzejuen artean kokatuta daude gaztelu honen aztarnak, 600 metroko altueran.

Ohi bezala, bi ibilbide antolatu dituzte. Luzeak 12 kilometroko luzera izango du, 800 metromo desnibelarekin eta laburrak, 4 kilometroko ibilbidea, 200 metroko desnibelarekin. Parte hartu nahi dutenentzako hitzordua larunbatean 8:30ean egin dute Lizartzako plazan eta kotxez joango dira irteera lekuraino.

Garañoko Gazteluan egun aztarna batzuk besterik ez dira geratzen. Erdi aroan Nafarroako Erresumako gaztelu nagusienetako bat izan zen. IX. mendeko txanponak aurkitu ziren bertan, iada garai horretarako eraikita zegoen adierazgarri eta XIV. mende amaieran desagertu zen Gaztelaren aurkako gudu baten ondoren.

Duela ia hiru hamarkada bailarako bizilagunak lekua berreskuratzen hasi ziren eta 2010etik hainbat kanpaina egin dituzte aztarnak azaleratzeko. Kanpoaldeko harresiaren zati bat, barnealdeko ertzaren beste bat eta omenaldi-dorrearen oinarria ikusi daitezke.