Tolosa Goierri

Euskara sustatzeko plan estrategikoa osatuko dute

Euskara belaunaldiz belaunaldi mantendu da Amezketan eta ehunka urtez ia euskara izan da bertako hizkuntza bakarra. Azken urteetan, ordea, aldaketa bat eman da, eta, gaur egun, herritarren % 88k daki euskaraz, eta erabilera kalean zein etxean ere jaitsi egin da bildutako azken datuen arabera.

Euskararen ezagutzan zein erabileran aurrerapausoak emateko, Udala etorkizunera begirako plangintza prestatzen ari da, herritarrekin eta eragileekin elkarlanean. Plangintzaren lehenengo pausua emateko, galdetegi bat prestatu du Udalak, eta webgunean erantzun daiteke online edota bulegoan bertan paperean. Galdetegia erantzuteko azken eguna datorren asteartea izango da, martxoak 11.

Erantzunak aztertzeko eta lehen estrategiak definitzeko, bilera ireki bat egingo da Pernando Amezketarra kultur etxean datorren ostegunean, martxoaren 13an, arratsaldeko 18:00etan.