'Drakula buruz behera', bihar Zimiterioan

I. A. ZIZURKIL.

Bihar, 'Drakula buruz behera', 19:00etan Zimiterioan, Ameztu Produkzioak taldearen eskutik XVII Antzerki astean. Ordua heldu da, atze-oihala zabalik, argiak prest, Drakula Buruz Behera antzerki lana hastera doa baina ... Oh! Sorpresa! Antzezleak desagertu dira, eszenografiaren arrastorik ez eta jantziak ez dira inondik agertzen. Zer egingo du zuzendariak egoera katastrofiko honen aurrean? Ikuskizuna bertan bera utzi? Ez, inola ere ez! Irudimena erabiliz eta pertsonaia berezi baten laguntzarekin, gure zuzendari ausartak banpiro odolzalerik ezagunenaren istorioa inoiz ez bezala kontatuko digu.

Udaberriari ongi etorria

Herri bizi gune taldeak antolatuta, sendaberak eta landare jangarriak ezagutzeko irteera egingo dute gaur. 10:00etan Pello Mari Otaño plazan elkartu eta sendabelar eta landare jangarriak biltzera aterako dira. 14:00etan Bildutakoaren dastaketa, Zimiterioa (Zizurkil goian). Ondoren, euskal egutegiko urteberriari ongi etorria.