Dena prest Larraitzen larreen irekierako

Eguerdi aldera irekiko dute langako kandadua eta lehen abereak igoko dira. /  NUÑEZ
Eguerdi aldera irekiko dute langako kandadua eta lehen abereak igoko dira. / NUÑEZ

Egun guztiko festa izango da eta goizeko 10:00etan irekiko dira azokako postuak

NUÑEZ ABALTZISKETA.

Bihar irekiko dira Aralarko larreak Larraitzen egingo den jai egunarekin. Postuak goizeko hamarretan irekiko dira ohitura den bezala eta eguerdian botako da txupinazoa, lehen animaliak larreetara igo-tzen hasi aurretik.

  Gipuzkoa osoko larreen irekiera eguna da bihar, baina Enirio-Aralar mankomunitatean ospatzen da festa, Aralar baita Gipuzkoan mendi garrantzitsu eta hedadura gehien hartzen duena. «Helburua abeltzainek egiten duten lana nabarmentzea da, mendiko larreak mantentzen dituztelako, bestela ez litzateke horrelako habitatik egongo», dio Jon Zubizarreta Abaltzisketako alkateak. Gaur egun Aralarren 41 borda daude, eta horietatik hamaika gaztandegi bezala egokituak daude, osasun-erregistroarekin.

  Neguan larreei deskantsua eman ondoren, maiatzean berriro ere milaka abere mendi garaietara itzuliko dira. Uda guztian abeltzainek esku egongo da larreen kudeaketa eta hori irudikatzeko Larraitzko langaren irekiera irudikatzen da. «Gipuzkoako Foru Aldundiko Mendi Zuzendariak, Arantxa Ariztimuñok, eta Enirio-Aralarko mankomunitateko lehendakariak, Jose Mari Santamariak, bando bat irakurriko dute kudeaketa abeltzainen esku utziz eta langako giltza emanez. Azken urteetan emakume abeltzain bat eta artzain-eskolatik ateratako gazte bat izan dira giltza hartzeko arduradunak, aurten pertsona ezagun bat ekarri nahi dugu», azaldu du Zubizarretak, «berak zin egingo du abeltzain guztien izenean kudeaketaren ardura hartuko dutela eta kalitatezko elikagaiak ekoiztuko dituztela».

 Gainera, larreen irekiera ekitaldira Gipuzkoako, Bizkaiko, Arabako eta Nafarroako abeltzainen elkarteetako ordezkariak gerturatuko dira, baita iparraldeko Laborantza Ganbarako ordezkariak ere. Beraiekin batera egongo da Asturiasko abeltzainen ordezkari bat eta Jaime Izquierdo, abeltzainen eta landa-eremuaren egoera babesten duen asturiar idazlea. «Oinarrian han hemen ditugun arazo berdinak dituzte, baina han otsoa ere badute», gogoratzen du.

Dantzariak eta azoka

Egun guztiko festa izango da maia-tzaren 1ekoa Larraitzen. Goizeko 10:00etan irekiko dira azokako postuak. Ekitaldi nagusia 11:30ean izango da, Foru Aldundiko eta Enirio-Aralarko mankomunitateko ordezkariek bandoa irakurri eta giltza abeltzainei emanez. Aurten pertsona ospetsu batek hartuko du giltza abeltzainen izenean. Jarraian, eguerdi aldera, suziria botako dute eta langako kandadua irekiko dute, lehenengo abereak igoz.

Ondoren, 12:30ean, Aurtzaka dantza taldeak emanaldia eskainiko du, Mikel Mendizabal eta Bixente Gorostidi bertsolariak, trikitilariak eta Jose Ignazio Barberia abeslariak jarriko dute giroa. Bitartean, behien, behorren, edota ardien erakusketa egongo da baita hainbat esku-langintzen erakustaldia ere. Bazkalondoren erromeriak 17:30ean jarraituko du Jexux Mujika eta Aitzol Txapartegirekin.