Bihar iritsiko da Korrika Lazkaora

Asteazkenean haurrentzako jolasak izan ziren plazan, Maizpideko ikasleen eskutik. /  ALARCIA
Asteazkenean haurrentzako jolasak izan ziren plazan, Maizpideko ikasleen eskutik. / ALARCIA

Goizeko 7.45 inguruan helduko da euskararen aldeko martxa, bere 21. edizioan | Korrika txikia, haur jolasak, buruhandi eta erraldoiak... festa giroa izango da nagusi Lazkaon Korrikaren lekukoa jasotzeko itxaronaldian.

AINARA ALARCIA LAZKAO.

Korrikaren 21. edizioa pasa den astean abiatu zen Garestik, Euskal Herria zeharkatu asmoz, eta larunbatean Lazkaotik pasa ondoren Bizkaiko bidea hartuko du, azkenik, igandean, Gasteizera iristeko. Bertan amaituko da aurtengoan Korrika eta festa handia izango da egun guztian zehar hiriburu arabarrean. Joan nahi duten lazkaotarrek autobusez egiteko aukera izango dute; goizeko 9.15etan irtengo da Lazkao Txiki zelaitik eta 19.30etan itzuliko da Gasteiztik.

Baina horren aurretik, Lazkaoko Korrika batzordeak eta herriko zenbait eragilek ekitaldi desberdinak antolatu dituzte aurten ere Korrikaren harira. Asteazkenean haurrentzako jolasak izan ziren plazan, Maizpideko ikasleen eskutik, eta gaur, ostirala, korrika txikia ospatuko dute San Benitoko ikasleek. Egunak eman dituzte ikastolako haurrak korrikarako petoak prestatzen eta gaurkoan pozik eramango dituzte soinean, 15.00etatik aurrera. Arratsaldean zehar talogileak eta txaranga ere izango dira herriko plazan.

Bihar berriz, l goizeko 7.45 inguruan -ordu ofiziala- iritsiko da Korrikaren lekukoa eta elkarte eta eragile desberdinetako ordezkarien eskutik eskura pasaz gurutzatuko du Lazkao, Olaberritik Idiazabal aldera joan aurretik. Festa giroan jarraituko dute ondoren lazkaotarrek, txokolate beroa guztiek elkarrekin gosalduz.

Erraldoi berrien aurkezpena

Lazkaoko Udalak bi erraldoi berri egin ditu, eta horiek aurkezteko ekitaldia ere bihar izango da, 11:00etatik aurrera, Korrika Lazkaotik igaro eta ondoren egingo den festatxoa amaitutakoan. Lazkaoko Udalak herritarrak gonbidatu nahi ditu aurkezpenera. Lazkaorekin lotura dute bi erraldoi berriek, baina bihar arte ez dugu jakingo zein pertsonaia izango diren.