Bihar hasiko dituzte jaiak Albizturren

Pilota partiduak, herri-kirol jaialdia eta barrikotea izango dira

NÚÑEZALBIZTUR.

Bihartik aurrera lau eguneko Andra Mari jaiak hasiko dituzte Albizturren. Bihar goizean, txistulariek kalejira egingo dute goizeko 9:00etatik aurrera herrian zehar diana joz. 11:00etan txupinazoa botako da udaletxeko balkoitik eta ondoren Meza Nagusia eskainiko da Andre Mariaren Jasokundeko elizan. Jarraian, jubilatuentzako hamaiketakoa eskainiko da. Eguerdian, herriko gaztetxoek pilota partidak jokatuko dituzte. Arratsaldeko 18:00etan, herri-kirol jaialdia izango da plazan, eta jarraian barrikotea egingo da. Gaueko 22:30ean Jone Uria eta Julene Otegirekin erromeria izango da.

Ostiralean altxorraren bila jolasa antolatuko da herrian zehar 12:30etik aurrera. Arratsaldeko 16:00etan, berriz, haurrentzako tailerra egingo da, eta 19:00etan Albiztour txirrindulari-lasterketa antolatuko da Bentatik plazaraino. Ordu berean, patata-tortilla lehiaketa antolatuko da. Egunari amaiera emateko pintxo-poteoa izango da plazan Ansorregi eta Larrañaga trikitilariek girotua.

Larunbatean, Mozorro festa antolatu da. Eguerdian triki-poteoa egingo da herrian zehar, eta 14:00etan gazteen eta umeen bazkaria egingo da. Bazkalondoren, 16:30etik aurrera, haurrentzako jolasak eta karaokea izango da plazan. Iluntzeko 21:00ean herri-afaria egingo da eta jarraian Kupela taldearekin erromeria.

Igandean amaituko dira Albizturko Andre Mariaren jaiak. Goizeko 11:15ean Meza Nagusia eskainiko da elizan. Jarraian, 13:00etan toka-txapelketa herrikoia antolatuko da plaza. Arratsaldean, 18:00etatik aurrera pilota jaialdia egongo da, binakako hiru partidekin.