Beasain

Sigi-Sagas festaren hirugarren edizioa ospatuko da larunbat arratsaldean

Uda, eguraldi ona eta Sigi-Sagas festa. Hiru osagai horiek elkartuko dira berriro larunbat honetan Sagastiguti parkean, Arrano Kultura elkartearen eskutik. Aurten, hirugarren edizioa beteko du ekimenak, eta herritarrentzat doako eta parte-hartze irekiko jarduerak prestatu dituzte egun osoan zehar.

Arratsaldeko 16:00etan hasita, zirku tailerra eskainiko da, haur eta helduentzako aproposa, mugimendua, oreka eta dibertsioa uztartzen dituena. Bertaratutakoek zirkuko diziplina desberdinak probatzeko aukera izango dute modu ludikoan: malabarismoak, oreka-jokoak eta bestelako trebetasunak landuz, adin guztietarako egokituta.

Ondoren, 18.00etatik aurrera, kontzertuak hartuko dute protagonismoa Sagastigutin. Hiru talde izango dira oholtza gainean: Deñe, Nabasi eta Mugan. Emanaldi hauek estilo eta erritmo anitzak eskainiko dituzte, eta giro bero eta parte-hartzailea sortzea dute helburu. Arrano Kulturak nabarmendu du musika eskaintzaren aniztasuna, eta jende guztiarentzako tokia egongo dela jaialdian.