Beasain

Mikel Urdangarinen eta Beasaingo Orkestraren kontzertua

Datorren larunbatean, maiatzaren 10ean, kontzertu berezi eta bakarra eskainiko da Beasainen: Mikel Urdangarin lehen aldiz arituko da Beasaingo Orkestrarekin batera, 'Badena eta ez dena' izeneko proiektu sinfonikoaren barruan. Saioa 19:30ean izango da, La Salle eskolako patioan.

Kontzertu honetan, Mikel Urdangarinen ibilbidean garrantzitsu izan diren kantu esanguratsuenak entzungo dira forma sinfonikoan. Piezen moldaketak Bingen Mendizabalek eta Koldo Uriartek egin dituzte, eta emanaldi osoa Xabier Zeberioren zuzendaritzapean eskainiko da. Bi musika unibertsoen –ahots eta gitarraren intimitatea eta orkestraren zabaltasuna– arteko topaketa izango da, eta zaleek aukera izango dute Mikel Urdangarinen lana bestelako ñabardurekin bizitzeko.

Emanaldia ikusgarria izatea espero da, bai musika mailan, bai emozioan, eta herriarentzat kultur hitzordu gogoangarria izango dela aurreikusten dute antolatzaileek.