Beasain

Larunbatean ospatuko dira Arriarango jaiak

Giro ezin hobea eta egitarau oparoa izango dira aurten ere Arriarango auzo jaietan larunbatean (hilak 28).

Goizeko 10:30ean hasiko da eguna, txistularien dianarekin. Ondoren, 11:00etan meza ospatuko da, eta 12:00etan luntxa eskainiko da auzoko giroa berotzeko. 12:30etik aurrera trikitilarien doinuak nagusituko dira, eta 13:00etan herri kirolak izango dira ikusgai.

14:30ean hasiko da eguneko lehen otordu nagusia: auzo bazkaria, Kaxolako Iker Markinezek prestatua. Helduentzako prezioa 50 eurokoa da, eta haurrentzakoa, 15 eurokoa.

Arratsaldean berriz, 17:30ean hasita puntto eta mus txapelketak jokatuko dira, eta 18:00etan umeentzako jolasak antolatuko dira. 19:00etan toka txapelketak hartuko du lekukoa, eta 20:30ean 'Arriantxo'-ren ipuinaren txanda izango da. 21:00etan auzo afaria egingo da. Dani Oiarbide eta Pello Urdangarin arduratuko dira jaiaren musika eta giro alaiaz.