Beasain

Igartza Literatur Bekan parte hartzeko aukera zabalik

Igartza Literatura Sor-kuntzako Bekak beste urte batez idazle gazteei aukera paregabea eskainiko die beren lanak garatu eta argitaratzeko. 2025eko edizioa abian da jada, eta parte hartu nahi dutenek ekainaren 30era arte izango dute proposamenak aurkezteko epea. Horretarako, udaletxeko erregistro ofizialean izena eman edo erregistro elektronikoa erabil daiteke.

Bekaren irabazlea irailaren 15a baino lehen hautatuko du epaimahaiak, eta aukeratutako proiektuak 10.000 euroko laguntza jasoko du. Diruaren erdia hautaketa egin eta berehala emango zaio, eta beste erdia, lana amaitutakoan. Egileak urtebeteko epea izango du bere idazlana amaitu eta aurkezteko, liburu formatuan argitaratu ahal izateko. Aurtengo epaimahaia Garazi Kamio Anduagak, Esti Martinez Diaz de Ceriok eta Olatz Mitxelena Larretak osatuko dute, eta haiek erabakiko dute beka jasotzeko moduko proiekturik dagoen ala ez.

Igartza beka 1998tik martxan dago eta euskal literaturan ibilbide nabarmena egin duten idazleen lehen urratsak erraztu ditu. Helburua gazteei laguntza ematea eta euskal literaturaren zabalkundea sustatzea da, eta azken urteetan, hainbat idazle ospetsuk euren lanak plazaratzeko baliatu dute.

Parte hartu ahal izateko, idazleek 35 urte baino gutxiago izan behar dute eta, helduentzako, gehienez bi lan argitaratuak eduki ditzakete. Bekaren irabazleek ezin izango dute berriz parte hartu, eta aurkeztutako lanek euskarazko narratiba izan behar dute, eleberriak edo ipuin-bildumak, betiere jatorrizkoak izanik.

Izena emateko, hainbat agiri aurkeztu beharko dira, hala nola egilearen datu pertsonalak (izena, abizenak, nortasun agiriaren kopia, helbidea, harremanetarako telefonoa eta posta elektronikoa). Horrez gain, aurkeztu nahi den kontakizunaren azalpena ere bidali beharko da, bi eta lau orri artekoa, kontakizunaren sinopsia, egitura eta estiloaren berri emanez. Halaber, 15 eta 20 orri bitarteko lagin bat gehitu beharko da, nahitaez jarraipena izango duen pasarte bat eskainiz, hasiera izan beharrik ez duen arren.

Parte hartu nahi duten gazteek aukera dute beka honi esker beren proiektuak aurrera eramateko eta idazle gisa garatzeko. Informazio gehigarria udaletxeko erregistroan edo webgune ofizialean aurki daiteke.