Mariren bisitak eta omenaldiak bete zuten Beasain Euskararen Egunean
Ehunka herritar, ikasle eta talde kulturalez osatutako egitarau zabalak euskararen aldeko jai giroa zabaldu zuen atzo
Atzo ospatu zen Euskararen Nazioarteko Eguna, eta egunak euskararen aldeko festa giroa eta parte-hartze handia utzi zituen herriko kaleetan. Egitarau zabala izan zen, eta herriaren konpromiso linguistikoa modu argian islatu zen goizetik hasita.
Goizeko ekitaldia izan zen egunak sortu zuen une berezienetako bat. 11:30ean, herriko ikastetxeetako haurrek Zubimuzu plaza poliki bete zuten, irakaslez eta familiz lagunduta. Giroa zoragarria zen: kolore biziko kriseiluak eskuetan zituztela, haurrek irribarre eta ilusioz hartu zuten plazan sartzen ari zen Mari, urteko hitzordu berezi honen protagonista.
Plazara sartzearekin batera, txalo zaparrada handi batek eta haurrek egindako oihu alaiekin hartu zuten Mari. Haur askok aurretik prestatutako abesti laburrak eta oihuak egin zituzten, eta inguruan zeuden irakasleek ere festarekin bat egin zuten.
Aurtengo berrikuntza bereziak ekitaldiari beste ikusgarritasun bat eman zion: haur bakoitzak bere Euskararen Kriseilua zekarren, aurreko egunetan ikastetxeetan sortua. Kriseiluetan euskararekin lotutako mezuak, irudiak edo desioak ikus zitezkeen, eta haurrek harrotasunez partekatu zituzten.
Marik, une sinboliko batean, Amaren Sua ekarri zuen, eta haren laguntzaz haurrak pixkanaka kriseiluak pizten hasi ziren. Plaza argi txikiz betetzen hasi zen. Haurrek kriseiluak altxatuta egin zuten azken agurra eta ekitaldia amaitzeko, talde argazkiak atera zuten.
Ixabel Olano, beti gogoan
Arratsaldeko 18:30ean, herriak omenaldi berezia egin zion Ixabel Olano Segurolari, Beasaingo ikastolako lehen andereño eta euskal kulturaren sustatzaile handiari. Bere izena daraman plazan, Beasainpediara lotzen duen QR kodigoa kokatu zen, haren ibilbidea eta ekarpena herritarrei eta bisitariei hurbiltzeko asmoz.
Ekitaldiak giro hunkigarria izan zuen. Aittu! Euskara Elkarteak plaka bat eman zion Ixabel Olanoren familiari, herrian euskara bultzatzeagatik egindako lan nekaezina aitortuz. Hainbat taldek parte hartu zuten ekitaldian: Musika Eskola, Narama eta Loinatz abesbatzak, Aurtzaka eta Ostadar dantza-taldeak, Goizeresi Txistulari Taldea, eta Ekaitz erraldoi eta buruhaundi konpartsa, guztiek omenaldiari izaera berezi eta koloretsua emanez.
