Aste honetan ikuskatuko dituzte balkoiak

Epaimahaiko kideek uztailaren 14an emango dute erabakiaren berri

AMAIA GOIKOETXEAALEGIA.

Alegiako Festa batzordeak herriko balkoi eta lorategi dotoreenak sarituko ditu aurten ere, eta epaimahaiko kideak aste honetan balkoi eta lorategiak ikuskatzen ibiliko dira herrian barrena: kolorea, landareen aniztasuna, estetika, konbinaketa eta txukuntasuna izango dira kontuan hartuko dituzten irizpideak. «Balkoiak eta lorategiak zaintzeko ohitura berreskuratzeko helburuarekin antolatzen dugu lehiaketa hau, eta horrek herriaren itxurari eta ingurumenari eragiten dion mesedea balioan jartzea da helburua», azaldu dute Festa batzordetik. Epaimahaiko kideek uztailaren 14an emango dute erabakiaren berri, Alegiako jaietako igandean. Maila bakoitzeko irabazleak 150 euroko erosketa txartel bat jasoko du Alegiako saltokietan kontsumitzeko. Saria jasotzera festetako sari banaketa ekitaldi horretara joan beharko da.