Amezketako herritarrek ikastolako sortzaileak omendu zituzten

Ikastolaren sortzaileak omendu zituzten ekitaldiaren baitan. / YARZA
Ikastolaren sortzaileak omendu zituzten ekitaldiaren baitan. / YARZA

YARZA AMEZKETA.

Eskola garaiko oroitzapenez betetako eguna izan zen atzokoa 'Ikastolatik Zumadira' liburuaren argitalpenaren aitzakian. Amezketan eskolaren inguruan egondako irakasleak, ikasleak eta gurasoak elkartu ziren aurkezpenerako eta, aldi berean, 1967an Ikastola sortu zuten guraso eta irakasleei omenaldia eskaini zieten.

Liburuaren helburua Ikastolaren mugimendua eta sorreraren lekuko-tza idatzia uztea bazen ere, testuingurua landu beharra ikusi zuten. Joxepi Saralegik azaldu zuenez, bera eta Koro Zabalak, Ikastolan irakasle aritu zirenak, beti izan zuten mugimendu haren inguruan idazteko ideia. Atzeratzen joan zen, lehengo urtean Ordiziako Ikastolaren 50. urteurrenaren inguruan liburua idatzi zutela-eta, berreskuratu zuten arte. Batekin eta besteekin hitz egin ondoren, idazketa taldea osatu zuten: Joxepi Saralegi bera, Antton Amondarain, Feli Etxeberria, Jose Mari Otermin eta Zumadi eskolako komunitateak.

Azken berrogeita hamar urtetako informazioa nagusi bada ere, Amezketan historian zehar eskolak izan duen presentzia ere azaltzen da liburuan. Honela, lehen aipamenak 1693koak dira eta lehenengo atalean 60. hamarkadara bitartean herrian izan zen eskola eta hezkuntza sistemak, Eskola Nazionalak eta ikastolen mugimenduaren hasiera, San Bartolome ikastolaren sorrera eta, amaitzeko, Zumadi eskolako irakasle, guraso eta ikasleek azken urteen errepasoa egin dute. Bixente Gorostidi herriko bertsolariak atal bakoitzaren hasierarako bi bertso idatzi ditu, atzoko ekitaldian abestu zirenak atal bakoitza azaldu aurretik.

«Abentura bat izan da, atsegina eta aberasgarria», aipatu zuen Jose Mari Oterminek. Eskolaren aitzakian, «Amezketaren inguruko erretratua, hausnarketa egiten du. Belaunaldi batek dugun Amezketaren inguruko ikuspuntua». Informazioaz eta argazkiez gain, 'Ikastolatik Zumadira' liburuko zutabe garrantzitsua dira bizipenak, bai autoreek zein eskola eta ikastola ezagutu zutenek oroitutakoak. Izan ere, hogei urtez ikastola eta eskola egon baziren ere, legez eskatzen zen gutxieneko taldea osatzeko zailtasunak medio Eskola Publikoa sor-tzera eraman zuen, Abaltzisketako eta Ugarteko eskolekin batera 1979-80an.

Aurkezpenaren ondoren, Ikastolako sortzaileak omendu zituzten: Alberto Etxeberria, Mari Karmen Zubeldia, Nemesio Etxeberria, Gregorio Alijostes, Jose eta Ani Etxeberria, Batista Galartza, Mattin Amundarain, Juan Amundarain, Mikel Amundarain, Maritxu Mugertza, Joxe Sagastume, Eladio Balerdi, Koro Zabala irakaslea, Izaskun Zubeldia irakaslea eta Joxepi Saralegi irakaslea. Lore sorta eta liburu bana jaso zuten eta eskolako ikasleek Zumadiko ereserkia abestu zieten. Bixente Gorostidi eta Anjel Mari Peñagarikano bertsolariek ere parte hartu zuten ekitaldian, bertsoak abestuz eta omenaldiko azken agurra eskainiaz. Ospakizunak borobiltzeko, herri-bazkaria izan zen frontoian.

Odol-ematea bihar

Bihar astelehenarekin, odola emateko aukera izango dute amezketarrek herrian bertan: arratsaldeko 18:30etik 20:30era zabalik izango dute kultur etxeko aretoa.