Ametsa pilota eskolako txapelketak baditu dagoeneko irabazleak

Gaztetxoak. Nahia Gorriti-Aimar Heras, eta Xuban Lopetegi-Oier Maiza./
Gaztetxoak. Nahia Gorriti-Aimar Heras, eta Xuban Lopetegi-Oier Maiza.

NÚÑEZ IRURA.

Irurako Ametsa xare eskolak urtero bezala eskolako pilotari gazteen arteko txapelketa antolatu du. Gaztetxoen zein gazteen mailako txapelketa antolatu zen eta finalak giro ezin hobean eta maila altuarekin jokatu ziren Ametsa trinketean.

Gaztetxoen mailan Oier Maiza eta Xuban Lopetegi izan ziren irabazleak Aimar Heras eta Nahia Gorriti irabazita. Lehenengo setean 12-11 gailendu ziren Maiza eta Lopetegi, bigarrena berriz Herasentzat eta Gorritirentzat izan zen 9-12. Azkena, 7-6 irabazi zuten, 3-6 galtzen joan ziren arren.

Gazteen mailan, Gorka Huizi eta Matxalen Mendizabal Julen Zabalegiren eta Iker Isasaren aurka aritu ziren finalean. Partida berdindua izan zen, Zabalegik eta Isasak 35-31 irabazi zutena.

Aste Santua

San Miguel elizako parrokiak Aste Santuko elizkizunak ospatuko ditu gaurtik aurrera. Arratsaldean, 19:00etan izango da gaur meza. Bihar, ostirala, Gurutze Bidea 11:00etan egingo da. Nekaldia 19:00etan izango da Anoetako elizan. Larunbatean, Pazko Gaubeila 21:00etan egingo da Iruran eta Pazko Igandeko meza Anoetan izango da 12:00etan.