Tolosa Goierri

Aiztondo Pilota Topaketako finalak, larunbatean

Aiztondo Pilota Topaketaren 26. edizioa amaierara iritsi da eta larunbatean jokatuko dituzte finalak, Adunako pilotalekuan. Aurten ere Villabonako Behar Zana, Adunako Txulobi, Zizurkilgo Zio-tza, Asteasuko Atzapar, eta Alkizako eta Larraulgo pilota eskoletako ehun pilotaritik gora parte hartu dute hiru hilabetez luzatu diren kanporaketetan.

Topaketako azken jardunaldian bost partida jokatuko dituzte, 16:00etatik aurrera. Txikienak, aurrebenjaminak hasiko dira, eta, kasu honetan, eskuz binaka Villabona-Zizurkil ordezkaztuz Behar Zanako Aramburu-Arin alde batetik eta Txulobitik Aduna ordezkatuz Carrilo eta Otermin arituko dira. Ondoren, benjamin mailan eskuz binaka, bi bikoteak Adunakoak eta Txulobikoak: Ruiz-Garcia batetik eta E. Aburuza eta I. Aburuza bestetik. Alebin mailan eskuz binaka Txulobiko Alkorta eta Cestau adunarrak Alkizako Roteta-San Sebastianen aurka jokatuko dute.

Jarraian, paleta modalitateko binakako finala jokatuko dute. Behar Zanako laukotea iritsi da: Ortiz de Murua-Elosegi Zizurkil-Villabona ordezkatuz eta Garitano-Aranburu Asteasu ordezkatuz. Azkenik, infantiletan, eskuz binaka ere Behar Zanako bi bikote sailkatu dira: Lertxundi-Eizagirre Asteasu eta Larraul ordezkatuz, eta Asteasuko Muxika eta Iraola.