Transfobia, feminizidio, papergabe, transgenero eta ahaldundu, hiztegira

Transfobia, feminizidio, papergabe, transgenero eta ahaldundu, hiztegira
Euskaltzaindia

Hiztegia sarean eguneratu du Euskaltzaindiak: azken sei hilabeteotan, 312 sarrera eta 85 azpisarrera berri arautu ditu; alegia, 397 forma berri

DVDonostia

Gizartearen isla diren forma berriak eranten dira hiztegietan. Euskaltzaindiak 397 forma berri arautu ditu azken sei hilabeteotan, eta moldaketa zein berrikuntza guztiak hiztegiari erantsi dizkio. Akademiak etengabe osatzen eta berrikusten du hiztegia, eta urtean bitan sareratzen ditu berrikuntzak.

2016an, bigarren argitalpena paperean atera zenetik eguneratzen du urtean bitan, eta 2019ko lehena da sareratu berri dena. Honela, azken sei hilabeteotan, 312 sarrera eta 85 azpisarrera berri arautu ditu Euskararen Akademiak; alegia, 397 forma berri. Horiez gain, beste 465 forma moldatu ditu. Egun, beraz, 39.188 sarrera eta 7.388 azpisarrera (hau da, 46.576 forma) eta 64.210 adiera ditu Euskaltzaindiaren Hiztegiak.

Erantsitako forma berrien artean daude, adibidez, gaixo(-)agiri eta sendagiri, eta horiekin batera, baja eta alta ere bai. Baxo (Ipar., Frantziako estatuan, bigarren hezkuntza ikasketak amaitu ondoren, unibertsitaterako sarbidea ematen duen azterketa; azterketa hori gainditzeak ematen duen ikasketa-maila), behe-maila edo lagunarteko hitzak ere txertatu dituzte; Hegoaldean lekua hartu dutenak ere bai, flipatu eta friki; janari-edarien kategorian, curry, sushi, tofu, pintxo, zurito; Baita ere, migrante, papergabe, feminizidio, ahaldundu,intersexual eta transgenero hitzak.

Izendapen berria eta estekak

Pertsona-izendegi berriak izendapen berria ekarri du: epizeno. Gainera, hainbat formatan definizioak moldatu edo osatu dira (brebeta, bazar, kongresu...), adierak gehitu dira (ezkontza, gorriak ikusi...), adibideak gehitu edo moldatu (zaintza, zirku...), loturak (berme, entzungor egin...) eta marka osagarriren bat gehitu (funtzionalismo, hutsarte...), etab. Eta azpisarrera gisa jasoa zegoen barazki-jale sarrera izatera pasatu da, barazkijale forman.

Orain arte ez bezala, sarrera batetik beste baterako loturetan estekak ezarri dira hiztegi osoan, zuzenean, klik baten bidez, aipatutako sarrera horretara joateko. Adibidez, hiztegian baxo kontsulta eginda, bi sarrera erakutsiko ditu hiztegiak. Lehenengoan 'ik. selektibitate' dago eta, horren gainean klik eginda, zuzenean selektibitate sarrerara eramango du erabiltzailea.

Temas

Euskera