«Ofizioari ikusgarritasuna emateko asmoz», gaztagintza eta ardi latxaren inguruko jolas didaktikoa sortu dute

aArtzainen egunerokotasuneko egoerak ezagutzeko aukera izango dute jokalariek/Arizmendi
aArtzainen egunerokotasuneko egoerak ezagutzeko aukera izango dute jokalariek / Arizmendi

'Latxa ardia' mahai jokoa Gema Arrugaetak sortu du. Jokalariek ardien bila baserritik irten eta gazta egiteko prozesua amaitu behar dute

'Latxa ardia' jolas didaktikoa sortu du Gema Arrugaeta argazkilariak euskal gaztagileen egunerokotasuna erakutsi eta «ofizioari ikusgarritasuna emateko asmoz». Horrela, artzainen egunerokotasuneko egoerak ezagutzeko aukera izango dute jokalariek, ardien bila baserritik irten eta gazta egiteko prozesua amaitu arte. Durangoko Azokan aurkeztu zuten lehenengoz, baina orain egin du Arrugaetak prentsaurrekoa, Bilboko Bolsan.

Adin guztietako lagunei dago bideratuta 'Latxa ardia' mahai jokoa, eta euskara zein gaztelaniazko bertsioak sortu dituzte, jokoa jasotako denek modu didaktiko eta atsegingarrian ikasteko aukera izan dezaten. Guztira, 1.000 ale sortu dituzte, bakoitza 19,5 euroan salgai.

Idiazabal Jatorri Deiturak eta Baserria Km0-k sortu dute mahai-jolasa, Bilboko Alde Zaharreko Merkatarien Elkartearen, Nafarroako Gobernuaren eta Lakuaren babesarekin. Antzara-jokoaren eta partxisaren arteko nahasketa bat da jolasa, baserri mundura moldatuta. Gazta egiten aurrena denak irabaziko du jokoan.

Gazta egiteko prozesuan pausoz pauso ezagutu eta egingo ditu jokalariak lau gazta mota: Erronkari, Idiazabal, Ossau Irati eta gazta urdina. Gazta horiek sortu ahal izateko artzaintzarako leku eta lanabesen berri ere izango dute jokalariek. Gazta egiteko prozesu horretan, baina, gorabeherak izango dituzte jokalariek, eta hainbat egoera topatuko dituzte bidean, ibilbidea erraztu edo oztopatuko dietenak.

Jose Maria Uztarroz Idiazabal Jatorri Deiturako presidenteak aurkezpenean adierazi duenez, jokoaren «helburua dibulgazioa da, ofizio honen eta historiaurretik gurekin dauden animalien inguruko kultura zabaltzea eta gurea den honen balioa nabarmentzea eta babestea», nabarmendu du.

Temas

Euskera
 

Fotos

Vídeos