Nafarroako legealdi berrian euskararen aldeko «jauzia egiteko» neurriak proposatu ditu Kontseiluak

Ekitaldia egin dute «hizkuntza-eskubideen afera erdigunera ekarri behar delako»/Kontseilua
Ekitaldia egin dute «hizkuntza-eskubideen afera erdigunera ekarri behar delako» / Kontseilua

Neurri zehatzak jarri dituzte mahai gainean, arkitektura juridikoa, administrazioa, hezkuntza, aisialdia, internet eta hedabideak nola euskaldundu eta babestu azalduz

El Diario Vasco
EL DIARIO VASCODonostia

Nafarroako hizkuntza politika kudeatzeko proposamenak aurkeztu ditu Euskararen Gizarte Erakundeen Kontseiluak, hauteskunde-kanpainaren baitan, «legegintzaldi berrian jauzia egiteko». Ekitaldia egin dute «hizkuntza-eskubideen afera erdigunera ekarri behar delako», azaldu du Paul Bilbao Kontseiluko idazkari nagusiak.

Hiru herritarren testigantzak jaso nahi izan dituzte ekitaldian, «hizkuntza-politikek eragin zuzen-zuzena dutela herritarrengan» erakusteko. Bat, legeak ezarritako eremu euskalduneko herritarra, mediku euskalduna ez izateak eragiten dizkion kalteak azaldu duena; bigarren bat, azken urteotan atzerriko hizkuntzei euskarari baino puntuazio handiagoa emateak sortu dituen bereizkeriak azaldutakoa; eta urte luzez D eredua lortzeko borrokan izan diren gurasoei orain PAI programa jartzeko derrigortasuna izan dituzte hizpide testigantza eman duena.

Kontseiluko arduradunak hizkuntza-politika berrirako bide-orria azaldu du, eta elkarlanerako deia egin: «Legegintzaldian Kontseiluak erantzukizunez jokatu du Gobernuarekiko, geu ere aldaketaren parte sentitzen ginelako. Etorkizunean erantzukizun bera izateko asmoa dugu, baina dei egiten diegu alderdi politikoei ere erantzukizunez joka dezaten» esan du.

Arkitektura juridikoa aldatu eta Euskararen Lege Berria onartzea proposatu du hasteko, Nafarroako Parlamentuak jarritako printzipio iradokitzaileak ardatz: Hizkuntza eskubideak bermatzea, zonifikazioa gainditzea eta ofizialtasuna Nafarroa osora hedatzea, hain zuzen.

Administrazioa euskalduntzea herritar euskaldunei euskara hutsezko harremana bermatu ahal izateko, hezkuntza sistemak belaunaldi berriak euskalduntzeko sistemak jartzea, helduen euskalduntzearen sektore indartzea, hala nola instituzioen zerbitzuak eskaintzen dituzten enpresa edo elkarteei hizkuntza irizpideak ezartzea herritarren eskubideak bermatzeko, edota instituzioek egiten dituzten kontratazioetan hizkuntza klausulak jartzea eta euskarazko hedabideak babestea hitzarmenen bidez ere proposatu dute.

Proposatutako gainerako neurrien artean daude, besteak beste, unibertsitatea eta lanbide heziketa euskalduntzea eskaintzaren %60, gutxienez, euskaraz izateko; kulturaren eta kirolaren esparruetan eskaintzen diren jardueren euskarazko eskaintza bermatzea; aisia zein ingurune digitala euskalduntzea; arnasguneen egoera soziolinguistikoan eragina izan dezakete proiektuak edo plangintzak onesteko prozesuan Eragin Linguistikoaren Ebaluazioa egitea eta horren araberako egokitze neurriak jartzea, eta udalerri euskaldunak Nafarroa osorako erreferente bihurtzeko ekimenak eta haien garapen kulturalki iraunkorra balioestea; eta, nola ez, erabilera soziala eta hizkuntza ohiturak aldatzeko ekimenak sustatzea eta hizkuntza politika egokia abian jartzea.

Temas

Euskera