LGTBIfobiaren kontrako behatokia izango du Gasteizek

LGTB harrotasunaren nazioarteko egunaren artxiboko irudia/Sara Santos
LGTB harrotasunaren nazioarteko egunaren artxiboko irudia / Sara Santos

Hiriko LGBT kolektiboek hala eskatuta sortu dute. Horrez gain, akonpainamendu eta sostengu psikologiko eta juridikoa emateko programak hobetzeko neurriak proposatu eta diseinatuko dira, besteak beste

El Diario Vasco
EL DIARIO VASCODonostia

Gasteizek LGTBIfobiaren kontrako behatokia izango du. Gorka Urtaran alkateak prentsaurrekoan jakitera eman duenez, Udalak bere politiketan sexu- eta genero-aniztasuna txertatzeko lau urteko ekintzen agenda amaitu du. Aurreratu duenez, LGTBI elkarteekin batera zehaztuko dira LGTBI pertsonei zuzendutako informazioa, kontzientziazioa, prebentzioa, detekzioa, bideratzea eta arreta hobetzeko jarraibideak.

Hiriko LGBTI kolektiboen eskariz sortu da behatokia. Ez da kolektiboa babestearren sustatuko duten ekintza bakarra, hala ere. Horrez gain, lesbianen kontrako berariazko indarkeriarekin lotutako arreta, akonpainamendu eta sostengu psikologiko eta juridikoa emateko programak hobetzeko neurriak proposatu eta diseinatuko dira, LGTBI elkarteekin batera.

Ikuspegi intersekzionala duen mapa bat ere landuko da, LGTBI pertsonentzat arriskutsuak izan daitezkeen alderdi eta ibilbideak identifikatzeko, eta hiriko hainbat lekutan cruising egiten duten pertsonei babesa eta segurtasuna bermatzeko neurriak hartzea ere aurreikusi da.

Landutako agendak, behatokiaz gain, Gasteizko Udala abian jartzekoa den hainbat estrategia eta jarduera zehazten ditu, 2018-2019 aldian berdintasunerako politiken barruan sexu- eta genero-aniztasuna txertatzeko, eta 2020-2021 urteetan lehentasunezko jarduera-ildoak identifikatzeko zenbait orientabide emateko.

«Agenda hau LGTBI pertsona eta kolektiboen eskaera eta ekarpenen emaitza da: Gasteizen sexu- eta genero-aniztasunaren alorrean diharduten elkarteak eta sexu- eta genero-aniztasunaren alorrean eta berdintasunerako politiketan diharduten erreferentziazko pertsonak; beraz, parte hartzea eta egindako lana eskertu nahi diegu horiei», esan du Urtaranek.

Izan ere, duela urte batzuk abiarazitako prozesu baten emaitza da proposamena, «beharrezkotzat jo baita berdintasun-politiketan 'emakume' subjektu politikoa zabaltzea, hari uko egin gabe, jatorria sexu-genero sisteman duten arrazoiengatik bazterkeria pairatzen duten pertsonak kontuan hartu ahal izateko. Badira zaurgarritasuna sortzen duten beste aldagai batzuk ere, hala nola adina, kultur jatorria, dibertsitate funtzionala, egoera administratiboa… Bazterkeria eta LGTBIfobiaren eragina areagotzen dute».

Udalaren Berdintasun Zerbitzuak 'DESIRAK PLAZARA. Gasteizko LGTBI biztanleriaren errealitateen diagnostikoa' egin du, eta berdintasunerako politiken barruan sexu- eta genero-aniztasuna txertatzeko erronka, eztabaida eta jokabideei buruzko ikerketa. Hara! Berdintasunerako IV. Planarekin lotura zuzena duten ekintzak ere bildu dira; udaleko beste sail batzuek gauzatu beharrekoak, eta Eusko Jaurlaritzaren eskumenekoak.

Temas

Euskera