Leipzig-en irakurle izan edo Renoko unibertsitate liburutegian lan egiteko bekak, zabalik

Leipzig-en irakurle izan edo Renoko unibertsitate liburutegian lan egiteko bekak, zabalik
AFP

Eusko Jaurlaritzak 30 urtetik beherako gazte tituludunei eskaintzen dizkien Global Training Bekak eskuratzeko izen-emateak zabalik daude jada

DVDonostia

Guztira 400 Global Training beka eskaintzen dira urtero Euskal Autonomia Erkidegoan, zazpi entitate ezberdinen bitartez; eta horien onuradunak unibertsitateko graduren batean edota goi mailako lanbide-heziketan titulua duten gazteak izan ohi dira. Eskaintzen artean, aurten ere badira Etxepare Euskal Institutuaren nazioarteko irakaskuntza esparruarekin zerikusia duten postuak.

Eusko Jaurlaritzak 30 urtetik beherako gazte tituludunei eskaintzen dizkien Global Training Bekak eskuratzeko izen-emateak zabalik daude jada; horiei esker, sei hilabetetik gorako egonaldiak egin daitezke nazioarteko hiri askotan, bertako enpresa batean praktika ordainduak eginez.

Eusko Jaurlaritzaren Ekonomiaren garapen eta Lehiakortasun Sailak sustatzen ditu beka hauek, gazte euskaldunek atzerriko enpresa eta erakundeetan heziketa praktikoaren bitartez gaitasunak lor ditzaten.

Beka horiek askotariko lan arloak har ditzakete: ingeniaritza, administrazioa, irakaskuntza edota medikuntza dira horietako batzuk. Lan eskaintzez eta izen-emateen kudeaketaz erakunde ezberdinak arduratzen dira, Euskal Herriko Unibertsitatea (UPV/EHU) edota Donostia Sustapena, besteak beste.

Etxepare Euskal Institutuak programa hau zuzenean kudeatzen ez duen arren, badira beka horien artean, Institutuaren lan arloarekin zerikusi zuzena duten lanpostu batzuk. Horiek dira, hain zuzen ere, Leipzig-eko (Alemania) eta Nevada-Renoko (AEB) unibertsitateetan eskaintzen direnak.

Izen-emateak irekita daude irailaren 13ra bitarte. Hemen azpian dago aipatutako bi bekei buruzko informazioa: Leipzig-eko Unibertsitatean Euskara eta Euskal Kultura irakurlearen laguntzaile izatekoa, eta Nevada-Renoko Unibertsitatean Center for Basque Studies-en (CBS) egoitzan eta Basque Library liburutegian lan egitekoa.

Temas

Euskera