Lehenengo braillearen nazioarteko eguna

Lehen aldiz ospatuko da modu ofizialean braillearen eguna/AFP
Lehen aldiz ospatuko da modu ofizialean braillearen eguna / AFP

Nazio Batuen Erakundeak izendatutako Braillearen Mundu Egunaren harira, Emilio Sola Eusko Jaurlaritzako Gizarte Zerbitzuetako zuzendariak gogorarazi du beharrezkoa dela «gure bizitzako ohiko indikazio guztietan Braille irakurketa txertatzen jarraitzea»

Nazio Batuen Erakundeak Braillearen Mundu Eguna izendatu du urtarrilaren 4a, eta horren harira, atarietan, igogailuetan, ontzietan, areto publikoetan eta hezkuntza-elementuetan egindako egokitzapen lanaren inguruan aritu da Emilio Sola Eusko Jaurlaritzako Gizarte Zerbitzuetako zuzendaria. Oso «positiboa»deritzo esparru horretan burututako lanari.

Solak uste du behar-beharrezkoa dela «gure bizitzako ohiko indikazio guztietan braille irakurketa txertatzen jarraitzea; positiboa da atarietan, igogailuetan, areto publikoetan, saltokietan, dendetan edo bestelako erreferentziazko puntuetan egindako lana, baina are gehiago zabaldu behar dugu, ikusmen-zailtasunak dituzten pertsonek bizimodua errazagoa izan dezaten lortuko badugu».

Nazio Batuen Erakundeak urtarrilaren 4a izendatu du Braillearen Mundu Eguna eta bihar, ostirala, lehen aldiz ospatuko da modu ofizialean. Fredric Schroeder Itsuen Mundu Batasuneko presidenteak aditzera eman duenez, urtarrilaren 4a bat dator Louis Braille irakurketa- eta idazketa-sistema horren sortzaile frantziarraren jaiotze-egunarekin.

Braillearen Mundu Egun berria ostiral gauez ospatuko da New Yorkeko Nazio Batuen Erakundeko egoitzan, bertan egingo den galan. Emilio Solak zorionak eman dizkie «ONCE erakundea eta pertsona itsuen beste erakunde batzuk osatzen dituztenei», egun hori nazioarteko egutegian nabarmentzeko eta irakurketa- eta idazketa-kode horren erabilera hedatzeko hezkuntzan, aisialdian, merkataritzan, kultura, eguneroko bizimoduan eta beste alderdi batzuetan.

Temas

Euskera
 

Fotos

Vídeos