Irati Alcantarilla, Eskolartekoan txapeldun

Maddi Sarasuak jantzi dio txapela Alcantarillari/Bertsozale Elkartea
Maddi Sarasuak jantzi dio txapela Alcantarillari / Bertsozale Elkartea

Aner Peritz 'Euzkitze' suertatu da txapeldunorde. Aitor Sarasuaren sendiaren izenean Maddi Sarasuak jantzi dio txapela txapeldunari

DVDonostia

Euskal Herri osoko 13 parte-hartzaile elkartu dira Sarako trinketean Eskolarteakoareb finalean. Irati Alcantarilla Urdanpilletak irabazi du, eta Aner Peritz 'Euzkitze' suertatu da txapeldunorde. Aitor Sarasuaren sendiaren izenean Maddi Sarasuak jantzi dio txapela txapeldunari.

«Eskolartekoak 15-18 urte bitarteko gazteak elkartzen ditu, eta zerbait esan nahiko du denek 18 urte bete arte jarraitzen badute!» dio Bertsozale Elkartetik Eskolartekoa koordinatzeko ardura duen Esti Alberdik.

Goizeko 11:00etan hasi da finala eta parte-hartzaileok igo dira oholtzara: Arabatik, Aroa Arrizubieta Barredo (Gasteiz, 2001) eta Aitor Ugarte Eriz (Aramaio, 2002); Baxenabarretik, Ekhi Perrier (Anhauze, 2001) eta Unai Harluxet (Irisarri, 2002); Bizkaitik, Maite Sarasola Isazelaia (Deustu, 2001) eta Bittor Altube Sarrionandia (Abadiño, 2001); Gipuzkoatik, Aitor Tatiegi Loidi (Oñati, 2001) eta Aner Peritz Manterola 'Euzkitze' (Zarautz, 2002); Lapurditik, Naia Etxeberri Larzabal (Baiona, 2002) eta Irati Alcantarilla Urdanpilleta (Urruña, 2001); Nafarroatik, Xabat Illarregi Marzol (Leitza, 2001) eta Ekhiñe Zapiain Arlegi (Bera, 2002); eta Zuberoatik, Leire Casamajou (Sohüta, 2002).

Julene Etxeberrik jarri dizkie gaiak. Ikasturtea gaindituko ez duela uste duen ikaslearen, itzaletik mugitu gabe dagoen soroslearen eta sare sozialak kritikatu baina Instagramen kontua ireki duen erabiltzailearen ahotik aritu dira kantuan, besteak beste.

Bi atal

Saio puntuagarriak bi atal izan ditu: lehenean agurra eta bi ofizio egokitu zaizkie parte hartzaileei. Ondotik, bigarren atalean, puntuazioz pasatako sei sailkatuek jarraitu dute kantuan. Aitor Tatiegi, Aner Peritz 'Euzkitze', Aroa Arrizubieta, Bittor Altube, Irati Alcantarrila eta Xabat Illarregi izan dira.

Behin bukaerako agurra eginda, Joana Itzainak eman du epaimahaiaren erabakiaren berri. 2019ko Euskal Herriko Eskolartekoaren txapelduna Irati Alcantarrila da eta Aner Periz 'Euzkitze', txapeldunordea. Aitor Jimenez Tolosana, Amaia Otxotorena Gamio, Eneko Bidegain Aire, Joakin Arregi Goenaga, Julen Zelaieta Iriarte eta Mirari Azula Aurrekoetxea aritu dira epaimahaian, eta idazkari lanetan Nerea Goñi Begiristain.

Irabazleari Maddi Sarasua Laskaraik jantzi dio txapela, Aitor Sarasuari bertsolaritzari egindako ekarpen handiari esker onez eta Sarasua sendiaren izenean. Bertsularien Lagunak elkarteko lehendakari izandakoa, elkarteko eragiletzan eta bertsu irakasle aritutakoa, belaunaldiz belaunaldiko transmisioan lan eskerga egindakoa izan da.

Ikastolen Elkarteak eta Bertsozale Elkarteak antolatzen dugu Eskolartekoaren bat-bateko txapelketa, eta zenbait erakunderen eta tokian tokiko hainbat eragileren laguntza ere izaten dugu. Egitasmoa lurraldez lurralde gauzatzen da: guztira, 98 parte-hartzaile izan ditu, eta 13 saio finalaren aurretik.

Temas

Euskera