Ingurunet, ingurumen kudeaketari buruzko informazio eta tramitazio sistema berria

Ingurumen kudeaketari buruzko prozedura administratibo guztiak elektronikoki tramitatu ahalko dira/Fotolia
Ingurumen kudeaketari buruzko prozedura administratibo guztiak elektronikoki tramitatu ahalko dira / Fotolia

Administrazio publiko, erakunde eta enpresen artean ingurumen tramiteetarako beharrezkoa duten dokumentazioa elkartrukatzeko tresna sortu du Jaurlaritzak

El Diario Vasco
EL DIARIO VASCODonostia

Ingurumen gaiei buruzko prozedura administratiboak elektronikoki tramitatu eta administrazio publiko, erakunde eta enpresen artean ingurumen izapideen betebeharrak betetzeko beharrezkoa duten dokumentazioa elkartrukatzeko tresna sortu dute: Ingurunet. Eusko Jaurlaritzako Ingurumen, Lurralde Plangintza eta Etxebizitza Sailak jarri du abian.

Tresna abian jartzearekin batera, Ingurumen Sailburuordetzak jardunaldi informatiboa egin du, enpresa eta udaletako 300 ordezkari baino gehiagorekin.

Ingurunet-en helburu nagusienetako bat da herritarrek, enpresek eta udalek euskal herri administrazioarekin egin beharreko ingurumen kudeaketa guztiak sinplifikatu eta bizkortzea, ahal den heinean. Izan ere, Eusko Jaurlaritzak jakinarazi duenez, espediente kopuru handia tramitatzen dute, eta kopuru hori hazten doa urtez urte, hein handi batean, alorrean eskumena duten administrazio ezberdinek ezarritako araudi eta kontrolak gehitu egin baitira, bereziki Europar Batasunetik igorri diren zuzentarauen ondorioz.

Azken lau urteotan, Ingurumen Sailburuordetzak egindako komunikazio eta izapideak %68 hazi dira: 2015eko 6.063 kasutik 2018ko 10.182 kasura. Haien garrantziagatik, ingurumen inpaktuaren ebaluazioaren espedienteen izapideak nabarmendu dira, ia hirukoiztu egin baitira (193tik 527ra), bai eta airearen kalitatearekin lotutakoak (2018an 480 eta 2015ean 86) eta lurzoruaren kalitateari buruzkoak ere (2015ean 1.147 eta 2018an 1.720). Ildo horretan, Plan eta Proiektuak Ebaluatzeko Dekretu berri bat garatzen ari da, bai eta lurzoruaren kutsadura prebenitu eta zuzentzeko legea garatuko duen Lurzoruen Dekretua ere.

Lau modulu

Sistema berria egunotan jarriko da abian, eta lau modulu izango ditu. Jarduera sailkatuak moduluaren bidez, Euskadiko udal guztiek aukera izango dute ingurumen erakunde autonomikoari neurri zuzentzaileen txostena eskatzeko, ondoren jarduera sailkatuaren udal baimenak igortzeko.

Halaber, Natura Ondarea moduluarekin, edozein pertsona fisiko zein juridikok, publiko edo pribatuk, Red Natura 2000 ekimenaren baitako espazioei buruzko eragin txostenak eskatu ahal izango ditu, proposatzen diren jardueren arabera.

Gainera, Kutsaduraren prebentzio eta zuzenketa bateratua moduluaren bidez, araubide hori bete beharreko enpresa guztiek baimen bateratu berri guztiak izapidetzeko aukera izango dute, ingurumen erakundeak ezarritako prebentzio eta zuzenketa neurrien arabera jarduerari hasiera emateko.

Azkenik, Etiketa ekologikoa moduluan, edozein pertsona fisiko edo juridikok, publiko edo pribatuk, ingurumen ondorio txikiagoa egiaztatzen duen produktu edo zerbitzuari dagokion etiketa ekologikoa eskatu ahal izango du. Ingurumen kudeaketari buruzko prozedura administratibo guztiak elektronikoki tramitatu ahalko dira.

Temas

Euskera